... loading ...
... loading ...
الیکشن کمیشن نے عام انتخابات کے لیے 26, 25 اور 27 جولائی کی تاریخ تجویز کی ہے جس کی حتمی منظوری صدر مملکت دینگے۔ الیکشن کمیشن کی جانب سے جون کے پہلے ہفتے انتخابی شیڈول جاری کیے جانے کا امکان ہے۔ نجی ٹی وی کی رپورٹ کے مطابق الیکشن کمیشن نے 2018ء کے انتخابات میں پہلی بارجدید ٹیکنالوجی کے استعمال کا فیصلہ کیا گیا ہے اور تاریخ میں پہلی بار آراوز کو لیپ ٹاپ دیئے جائینگے۔ اسی طرح ریٹرننگ افسروں کو دو دو ڈیٹا انٹری آپریٹرز بھی دے دیئے گئے ہیں جو پولنگ سٹیشن سے موصول رزلٹ تیار کرینگے۔ پریذائیڈنگ افسران پولنگ سٹیشن سے ہی رزلٹ کی تصاویر ریٹرننگ افسروں کو بھجوائیں گے اور ریٹرننگ افسر رات 2 بجے تک رزلٹ الیکشن کمیشن کو بھجوانے کے پابند ہونگے جبکہ رزلٹ میں تاخیر کی ریٹرننگ افسر کو تحریری وجوہات دینا ہونگی۔ الیکشن کمیشن کی جانب سے صدر مملکت کو بھجوائی گئی سمری میں بتایا گیا ہے کہ 2018ء کے عام انتخابات میں ڈسٹرکٹ ریٹرننگ افسران کی تعیناتی ماتحت عدلیہ کے جوڈیشل افسران سے کی جائیگی جس کے لیے ہائیکورٹوں کے رجسٹرار حضرات سے ڈسٹرکٹ و سیشن ججوں اور سول ججوں کی فہرستیں مانگی جاچکی ہیں۔ اس سلسلہ میں الیکشن کمیشن پنجاب نے بھی الیکشن 2018ء کے لیے پنجاب بھر میں پولنگ ا سکیموں کو حتمی شکل دے دی ہے۔ ذرائع کے مطابق الیکشن کمیشن نے جرمنی سے بیلٹ پیپر واٹرمارک منگوالیے ہیں۔ اس سلسلہ میں سینٹ کی قائمہ کمیٹی برائے پارلیمانی امور نے الیکشن کمیشن کے رزلٹ مینجمنٹ سسٹم پر تحفظات کا اظہار کیا ہے اور کمیٹی کے روبرو پیش ہونیوالے الیکشن کمیشن کے ایڈیشنل سیکرٹری ظفراقبال کو باور کرایا ہے کہ 2013ء کے انتخابات پر آج بھی سوالیہ نشان موجود ہے اس لیے ہم چاہتے ہیں کہ 2018ء کے انتخابات میں سیاہی اور بیلٹ پیپرز کے مسائل نہ ہوں۔ الیکشن بہرصورت شفاف ہونے چاہئیں اور جو غلطیاں پہلے ہوئی ہیں‘ وہ دوبارہ سرزد نہیں ہونی چاہیے۔
یہ خوش آئند صورتحال ہے کہ انتخابات میں حصہ لینے والی دو بڑی جماعتوں مسلم لیگ (ن) اور تحریک انصاف نے الیکشن کمیشن کی جانب سے 2018ء کے انتخابات کے لیے کیے گئے انتظامات پر اطمینان کا اظہار کیا ہے۔ اس سلسلہ میں مسلم لیگ (ن) کے مرکزی رہنماء سینیٹر آصف سعید کرمانی نے الیکشن کمیشن کی جانب سے انتخابات کے لیے جدید دور کے طریقے اختیار کرنے کو خوش آئند قرار دیا اور کہا کہ اس امر کو بہرصورت یقینی بنایا جائے کہ نتائج مرتب کرتے وقت کوئی گڑبڑ نہ کی جائے۔ انہوں نے تجویز پیش کی کہ پریذائیڈنگ افسران پولنگ سٹیشن پر رزلٹ کی تصاویر ریٹرننگ افسروں کو بھیجتے ہوئے ہر متعلقہ امیدوار کو بھی بھجوا دیں تاکہ امیدوار بالخصوص انتخابات میں حصہ لینے والی سیاسی جماعتیں بھی ساتھ ہی ساتھ رزلٹ مرتب کر سکیں۔ اسی طرح تحریک انصاف پنجاب سنٹرل کے صدر عبدالعلیم خان نے بھی الیکشن کمیشن کے اقدامات کو تسلی بخش قرار دیا۔ 2013ء کے انتخابات کے حوالے سے چونکہ سب سے زیادہ تحریک انصاف کو ہی شکایت لاحق ہوئی تھی جس نے مبینہ انتخابی دھاندلیوں کو بنیاد بنا کر الیکشن کمیشن کو رگیدا اور مسلم لیگ (ن) کی حکومت کیخلاف لانگ مارچ اور دھرنوں کی تحریک شروع کی اس لیے اب تحریک انصاف کی جانب سے 2018ء کے انتخابات کے لیے الیکشن کے انتظامات پر مطمئن ہونا الیکشن کمیشن پر اعتماد کا اظہار ہے تاہم انتخابی دھاندلیوں کے الزامات ہمارے انتخابی کلچر کا حصہ ہے اس لیے الیکشن کمیشن کو بہرصورت ایسے الزامات کا 2018ء کے انتخابات کے حوالے سے بھی سامنا کرنا پڑیگا۔ قبل از انتخابات دھاندلی کے الزامات کا سلسلہ تو ابھی سے شروع ہوگیا ہے جس کے لیے مسلم لیگ (ن) کی قیادت ’’خلائی مخلوق‘‘ کی اصطلاح استعمال کرکے 2018 ء کے انتخابات کے حوالے سے الیکشن کمیشن کے بے وقعت ہونے کا الزام عائد کرچکی ہے جبکہ مسلم لیگ (ن) اور پیپلزپارٹی کی جانب سے عمران خان کے اپنی ممکنہ حکومت کے پہلے سو دن کے اعلان کردہ کاموں پر بھی تحفظات کا اظہار کرتے ہوئے اسے قبل ازانتخابات دھاندلی قرار دیا جاچکا ہے۔ اپوزیشن لیڈر سید خورشید شاہ کے بقول تحریک انصاف کا پروگرام عوام کے سامنے پیش کرنا دھاندلی کی جانب اشارہ ہے اس لیے وہ انتخابات جیت بھی گئی تو کوئی اس الیکشن کو ماننے کے لیے تیار نہیں ہوگا۔ انہوں نے ساتھ ہی ساتھ یہ چیلنج بھی دے دیا کہ عمران خان کے دعوے سو روز میں پورے ہوگئے تو وہ سیاست چھوڑ دینگے۔ مسلم لیگ (ن) کے صدر اور وزیراعلیٰ پنجاب میاں شہبازشریف نے بھی اسی تناظر میں باور کرایا ہے کہ 100 دن کی باتیں کرنیوالے عوام کو سبزباغ دکھا رہے ہیں۔ ان کا اصل مقصد محض کرسی ہے جس کے لیے آج زرداری‘ نیازی بھائی بھائی بن گئے ہیں۔
ایسے الزامات تو بہرصورت انتخابات کے انعقاد تک اور پھر انتخابات کے نتائج سامنے آنے کے بعد لگتے ہی رہیں گے کیونکہ ہارنے والے کسی امیدوار یاپارٹی کے لیے خوش دلی سے انتخابی نتائج قبول کرنا بہت مشکل ہوتا ہے تاہم خوش آئند صورتحال یہ ہے کہ انتخابات کے بروقت انعقاد کے حوالے سے اب تک سیاسی افق پر چھائی غیریقینی کی فضا اب چھٹنے لگی ہے اور انتخابات میں ’’خلائی مخلوق‘‘ کے عمل دخل کے حوالے سے ایک دوسرے کے ساتھ بلیم گیم کھیلنے والی سیاسی جماعتوں کو بھی اب مقررہ وقت کے اندر انتخابات کے انعقاد کا یقین آنے لگا ہے چنانچہ آج مسلم لیگ (ن) کی قیادت بھی انتخابی عمل پر تحفظات کے اظہار کے باوجود پبلک جلسوں کے ذریعہ عوام کے ساتھ رابطے میں ہے اور تحریک انصاف‘ پیپلزپارٹی‘ جماعت اسلامی اور جمعیت علماء اسلام (ف) سمیت دوسری تمام جماعتیں بھی اپنے پبلک جلسوں کے ذریعے سیاسی ماحول کو گرما رہی ہیں۔ اگر سیاسی جماعتوں اور انکی قیادتوں نے سیاسی ماحول گرمانے کے عمل میں محاذآرائی اور کشیدگی کی نوبت نہ آنے دی تو الیکشن کمیشن کے تجویز کردہ شیڈول کے مطابق آئندہ دو ماہ تک 2018ء کے انتخابات کا انعقاد یقینی ہے۔ یہ صورتحال یقیناً تمام قومی سیاسی قائدین سے مکمل احتیاط کی متقاضی ہے۔ اگر وہ احتیاط کا دامن چھوڑیں گے اور انتخابی مہم کے دوران انکے کسی طرز عمل سے سیاسی کشیدگی اور محاذآرائی بڑھتے بڑھتے کسی تصادم کی نوبت لائے گی تو ایسے حالات میں انتخابی عمل کو بریک لگانے کے لیے کسی ماورائے آئین اقدام کو بعیدازقیاس قرار نہیں دیا جا سکتا۔ اس تناظر میں قومی سیاسی قیادتوں پر بھی بھاری ذمہ داری آن پڑی ہے کہ وہ ٹریک پر چڑھی جمہوریت کی گاڑی کو سبک خرامی سے رواں رکھیں اور اپنے کسی بھی اقدام سے ان عناصر کو فائدہ اٹھانے کا موقع فراہم نہ کریں جو اپنے مفادات کے تحت جمہوری عمل کو سبوتاڑ کرانے کے لیے موقع کی تاک میں بیٹھے ہوئے ہیں۔
انتخابات میں حصہ لینے والی سیاسی جماعتوں کو اب ایک دوسرے کی ٹانگ کھینچنے کے بجائے اپنے اپنے ٹھوس انتخابی منشور کے ساتھ رابطہ عوام مہم کو آگے بڑھانا چاہیے۔ مسلم لیگ (ن) نے پہلے ہی اپنی رابطہ عوام مہم کا شیڈول طے کرکے اسکے مطابق پبلک جلسوں کا سلسلہ شروع کر رکھا ہے جن میں میاں نوازشریف اپنے سیاسی بیانیے پر زور دے رہے ہیں اور اپنے ووٹرز کو باور کرا رہے ہیں کہ انتخابات میں انہیں بھاری مینڈیٹ ملے گا تو وہ ووٹ کی اس طاقت سے خود بھی اقتدار کے ایوانوں میں واپس آجائینگے اور جمہوریت کی عملداری پر زد پڑنے کا باعث بننے والی آئینی اور قانونی شقوں میں بھی تبدیلی لے آئینگے۔ انکے ریاستی اداروں کیساتھ ٹکرائو کا تاثر مضبوط بنانے والے سیاسی بیانیے کے باعث ہی مقررہ وقت پر انتخابات کے انعقاد کے بارے میں چہ میگوئیوں کا سلسلہ شروع ہوا اور یہ تاثر مضبوط ہوتا نظر آیا کہ میاں نوازشریف کی اس سوچ کی بنیاد پر انتخابات میں انکی پارٹی کو سرخرو ہونے کا مشکل ہی سے موقع فراہم کیا جائیگا اس لیے مقررہ میعاد میں انتخابات کے انعقاد پر غیریقینی کے بادل چھائے نظر آنے لگے۔ تاہم میاں شہبازشریف کی زیرقیادت مسلم لیگ (ن) کی جانب سے تمام متعلقین کو اداروں کے ساتھ ٹکرائو سے گریز اور مفاہمانہ سیاست کا ٹھوس پیغام دیا جارہا ہے جس کی بنیاد پر انتخابی ماحول میں غیریقینی کی فضا اب چھٹتی نظر آرہی ہے اور الیکشن کمیشن کی جانب سے مجوزہ انتخابی شیڈول اور انتخابات کی ٹھوس بنیادوں پر تیاری سے اب مقررہ وقت میں انتخابات کا انعقاد یقینی نظر آنے لگا ہے۔
اس وقت تمام سیاسی جماعتوں کے لیے انتخابی دنگل میں اترنے کے یکساں مواقع موجود ہیں جبکہ تین بڑی جماعتوں مسلم لیگ (ن)‘ پی ٹی آئی اور پیپلزپارٹی کے پاس وفاق اور صوبوں میں اپنی اپنی حکومت کی کارکردگی کا سہارا بھی موجود ہے۔ عمران خان نے اپنی خیبر پی کے حکومت کی کارکردگی کی بنیاد پر ہی اپنی ممکنہ وفاقی حکومت کے پہلے سو دن کے کاموں کی فہرست مرتب کی ہے جو دو روز قبل عوام کے سامنے پیش بھی کردی گئی ہے اس لیے عوام آئندہ کی قیادت کے لیے انتخابات سے قبل اپنے ذہن میں کوئی نہ کوئی خاکہ ضرور بنالیں گے۔ اس صورتحال میں توقع کی جانی چاہیے کہ الیکشن کمیشن اپنی کمٹمنٹ کے مطابق صحیح معنوں میں آزادانہ‘ منصفانہ اور شفاف انتخابات کرانے میں کامیاب ہو جائیگا جس کے بعد کسی جماعت یا امیدوار کے لیے انتخابی دھاندلیوں کے الزامات لگا کر انتخابی عمل کو مشکوک بنانا مشکل ہو گا۔اگر اب تک ہماری سیاسی فضا مکدر رہی ہے اور انتخابات کے بروقت اور شفاف انعقاد کے معاملہ میں غیریقینی کی فضا نظر آتی رہی ہے تو اس میں سیاسی قائدین کے علاوہ متعلقہ ادارے بھی اپنا حصہ ڈالتے نظر آتے رہے ہیں۔ بے لاگ احتساب یقیناً پوری قوم کا مطمح? نظر ہے تاہم انتخابی عمل کے دوران کسی مخصوص سیاسی جماعت اور اسکی قیادت کیخلاف احتساب کی کارروائی کو گرمانا اسکے بارے میں رائے عامہ تبدیل کرانے کی کوشش ہی ہو سکتی ہے۔ احتساب کا عمل عام انتخابات کے انعقاد کے بعد بھی جاری رہ سکتا ہے تاہم اس وقت جبکہ الیکشن کمیشن کی جانب سے انتخابات کے انعقاد کی ممکنہ تاریخ کا بھی اعلان کیا جا چکا ہے۔ انتخابات میں حصہ لینے والی کسی بھی پارٹی اور اسکی قیادت کیخلاف احتساب کی کارروائی جاری رکھنا اسے انتخابی سیاسی عمل سے باہر نکالنے کی کوشش سمجھی جائیگی۔ اگر اس موقع پر کسی پارٹی کے لیے انتخابی میدان میں آزادانہ طور پر اترنے کے راستے مسدود کیے گئے تو اس سے انتخابی عمل مشکوک ہی نہیں‘ متنازعہ اور ناقابل قبول بھی ہو سکتا ہے اس لیے الیکشن کمیشن کو انتخابی تیاریوں میں یہ امر بھی یقینی بنانا چاہیے کہ کسی جماعت کے لیے انتخابی میدان میں اترنے کے راستے بند نہ ہوں۔ یقیناً یہ الیکشن کمیشن کی اہلیت کا امتحان ہے اور قوم کو توقع ہے کہ الیکشن کمیشن اس امتحان میں سرخرو ہوگا۔
ایرانی تیل کی پاکستان میں اسمگلنگ پر سیکیورٹی ادارے کی رپورٹ میں اہم انکشافات سامنے آگئے ۔پاکستان میں ایرانی تیل کی اسمگلنگ کے بارے میں رپورٹ منظرعام پر آگئی ہے جس میں کہا گیا کہ پاکستان میں سالانہ 2 ارب 80 کروڑ لیٹر ایرانی تیل اسمگل کیا جاتا ہے اور اسمگلنگ سے قومی خزانے کو سالان...
سندھ کابینہ نے رینجرز کی کراچی میں تعیناتی کی مدت میں 180 دن کے اضافے کی منظوری دے دی۔ترجمان حکومت سندھ نے بتایا کہ رینجرز کی کراچی میں تعیناتی 13 جون 2024 سے 9 دسمبر 2024 تک ہے ، جس دوران رینجرز کو انسداد دہشت گردی ایکٹ 1997 کے تحت اختیارات حاصل رہیں گے ۔کابینہ نے گزشتہ کابینہ ا...
بھارتی وزیراعظم نریندر مودی انتخابات میں کامیابی کے لیے بھارتی مسلمانوں اور پاکستان کو دھمکی دے رہے ہیں ۔ دی وائر کے مطابق بی جے پی نے آفیشل انسٹاگرام ہینڈل کے ذریعے مودی کی ایک ویڈیو جاری کی ہے جس میں مودی کہتے ہیں کہ اگر کانگریس اقتدار میں آئی تو وہ ہندؤں کی جائیداد اور دولت م...
اسرائیلی وزیراعظم نیتن یاہو نے کسی بھی صورت غزہ میں جنگ بندی تسلیم کرنے سے انکار کردیا۔غیرملکی خبررساں ادارے کے مطابق امریکی وزیر خارجہ انٹونی بلنکن سے ملاقات میں انہوں نے کہا کہ کوئی ایسا معاہدہ تسلیم نہیں جس میں جنگ کا خاتمہ شامل ہو۔اسرائیلی وزیراعظم کا کہنا تھا کہ حماس نے جنگ ...
جمعیت علمائے اسلام (جے یو آئی)کو کراچی میں جلسے کی اجازت نہیں ملی اس حوالے سے ڈپٹی کمشنر شرقی نے بتایا کہ جے یو آئی کو ایس ایس پی ایسٹ کی رپورٹ پر جلسہ کرنے کی اجازت نہیں دی گئی۔ ایس ایس پی ایسٹ کی رپورٹ میں کہا گیا ہے کہ شہر میں حالیہ دہشت گردی کے واقعات کے پیش نظر بڑے عوامی اجت...
وزیر اعلیٰ خیبر پختونخوا علی امین گنڈاپور نے کہا ہے کہ کوئی بات ہوگی تو سب کے سامنے ہوگی اور کوئی بات چیت کسی سے چھپ کر نہیں ہوگی،بانی پی ٹی آئی نے نہ کبھی ڈیل کی ہے اور نہ ڈیل کے حق میں ہیں، یہ نہ سوچیں کہ وہ کرسی کیلئے ڈیل کریں گے ۔میڈیا نمائندگان سے گفتگو کرتے ہوئے علی امین گن...
فلسطینیوں پر اسرائیلی مظالم کے خلاف طلبہ کے احتجاج کا سلسلہ دنیا بھر کی جامعات میں پھیلنے لگا۔امریکا، کینیڈا، فرانس اور آسٹریلیا کی جامعات کے بعد یونان اور لبنان کی جامعات میں بھی طلبہ نے غزہ میں اسرائیلی جارحیت کے خلاف مظاہرہ کیا۔امریکی جامعات میں احتجاج کا سلسلہ تیرہویں روز بھی...
غزہ میں مظالم کے خلاف اسرائیل کی مبینہ حمایت کرنے والی کمپنیوں کے بائیکاٹ کی مہم میں شدت آتی جا رہی ہے ۔ معروف امریکی فوڈ چین کے ایف سی نے ملائیشیا میں اپنے 100 سے زائد ریستوران عارضی طور پر بند کرنیکا اعلان کر دیا۔غیر ملکی میڈیا کے مطابق ملائیشیا میں امریکی فوڈ چین کی فرنچائز کم...
جمعیت علمائے اسلام کے سربراہ مولانا فضل الرحمان نے وزیراعظم شہباز شریف اور وزیراعلیٰ پنجاب مریم نواز کے شوہر کیپٹن (ر) صفدر کو طنز کا نشانہ بنایا ہے ۔لاہور میں فلسطین کانفرنس سے خطاب میں مولانا فضل الرحمان کا کہنا تھاکہ یہاں بلاوجہ شہباز شریف کی شکایت کی گئی اس بیچارے کی حکومت ہی...
وزیراعظم شہباز شریف نے کہا ہے کہ کرپشن کا ملک سے خاتمہ ہونے والا ہے ، ہم سب مل کر پاکستان کو انشااللہ اس کا جائز مقام دلوائیں گے اور جلد پاکستان اقوام عالم میں اپنا جائز مقام حاصل کر لے گا۔لاہور میں عالمی یوم مزدور کے موقع پر اپنی ذاتی رہائش گاہ پر تقریب سے خطاب کرتے ہوئے وزیرِ ا...
غیر قانونی طور پر بھارت کے زیر قبضہ جموں و کشمیر میں بی جے پی کے رہنما راجوری اور پونچھ میں مسلمانوں کو دھمکیاں دے رہے ہیں کہ وہ یا تو سنگھ پریوار کے حمایت یافتہ امیدوار کو ووٹ دیں یا1947 جیسی صورتحال کا سامنا کرنے کے لیے تیار رہیں۔ کشمیرمیڈیاسروس کے مطابق 1947میں جموں خطے میں ہن...
پی ٹی آئی نے جمعیت علما اسلام کے سربراہ مولانا فضل الرحمان سے فوری رابطے کا فیصلہ کیا ہے ۔ذرائع کے مطابق تحریک انصاف نے مولانا فضل الرحمان سے فوری رابطے کا فیصلہ کیا ہے ، جے یو آئی ف کے سربراہ کو احتجاجی تحریک میں شامل ہونے کے لیے باقاعدہ دعوت دی جائے گی۔ذرائع کے مطابق مذاکراتی ک...
