پہلگام واقعہ میں بھارتی جھوٹ

ریاض احمدچودھری

پہلگام فالس فلیگ آپریشن کا ایک سال گزر چکا ہے مگر بھارت ابھی تک اپنے موقف کے حق میں شواہد پیش نہیں کر سکا۔ پاکستان نے پہلگام واقعہ کی آزادانہ تحقیقات کرانے کی پیشکش کی تو بھارت اس سے خوفزدہ ہو گیا۔ عالمی سطح پر پہلگام واقعہ سے متعلق سوالات اٹھائے گئے جن کا بھارت کے پاس کوئی تسلی بخش جواب موجود نہیں ہے۔ پہلگام واقعہ فالس فلیگ آپریشن۔ بھارتی مہم جوئی کا فیصلہ کن جواب دیا گیا۔ پاکستان کی فتح کو پوری دنیا نے دیکھا ۔بھارت آج بھی زخم چاٹ رہا ہے ۔بھارت کے غیر قانونی زیر قبضہ جموں وکشمیر میں بھارتی انتظامیہ نے پہلگام فالس فلیگ آپریشن کا ایک برس مکمل ہونے کے موقع پر سخت پابندیاں عائد کر دی ہیں جس سے پہلے سے بھارتی ریاستی دہشت گردی کا شکار کشمیریوںکی مشکلات میںمزید اضافہ ہوگیا ہے۔
پہلگام سمیت اہم سیاحتی مقامات اور حساس علاقوں میں حفاظتی اقدامات کے نام پر سخت پابندیاں عائد کی گئی ہیں،بھارتی فورسز کی اضافی تعیناتی عمل میں لائی گئی ہے، بھارتی اہلکاروں نے اضافی چیک پوسٹیں قائم کی ہیں جہاں گاڑیوں ، مسافروں اور راہگیروںکی سخت تلاشی لی جا رہی ہے۔یادر ہے کہ گزشتہ برس 22 اپریل کو مقبوضہ وادی کشمیر کے مشہور سیاحتی مقام پہگام میں بایسران میدان میں اندھا دھند فائرنگ کا واقعہ پیش آیا تھا جس میں کئی بھارتی سیا ح ہلاک ہو گئے تھے۔بھارت نے کشمیریوں کی حق پر مبنی تحریک آزادی اور پاکستان کو بدنام کرنے کیلئے اس حملے کا ذمہ دار کشمیری عسکریت پسندوں اور پاکستان کو ٹھہرایا۔ پاکستان نے بھارت کو حملے کی آزادانہ تحقیقات کی پیشکش کی جو اس نے نہ صرف مستر د کی بلکہ اس حملے کی آڑ میں رات کی تاریکی میں مملکت خداداد پر حملہ آور ہوا اور بے گناہ بچوں اور خواتین سمیت کئی افراد شہید کر دیے۔ پاکستان نے آپریشن بنیان المرصوص کے تحت بھارتی جارحیت کا ایک انتہائی دندان شکن جواب دیا ، اسکے جدیدترین رافیل طیاروں سمیت کئی جنگی جہاز مار گرائے اور ایک مکار اور جھوٹے دشمن کو ایسی عبرتناک شکت دی جو وہ مدتوں یاد رکھے گا۔بھارتی میڈیا نے پہلگام واقعہ پر محض پروپیگنڈا اور من گھڑت بیانیے کو فروغ دیا جس سے اس کا مکروہ چہرہ پوری دنیا میں بے نقاب ہوا۔ بھارتی عسکری قیادت کے نئے آپریشن سندور کے بارے میں حالیہ بیانات دراصل ان کی ناکامی اور شکست کا اعتراف ہیں۔ بھارت کو یہ بات واضح طور پر سمجھ لینی چاہئے کہ کسی بھی قسم کے مس ایڈوینچر کا بھرپور، فوری، موثر اور فیصلہ کن جواب آئے گا۔ بھارت اپنی ناکام پالیسیوں کی بدولت عالمی سطح پر تنہائی کا شکار ہو چکا ہے جبکہ پاکستان امن مشن کو لے کر آگے بڑھ رہا ہے۔ عالمی میڈیا، سول سوسائٹی اور مختلف تجزیہ کاروں کی جانب سے پہلگام واقعہ پر سنجیدہ سوالات اٹھائے گئے مگر بھارت ان کا جواب دینے کے بجائے پاکستان کے خلاف نفرت اور اپنے جھوٹے بیانیے کا راگ الاپتا رہا ہے، بین الاقوامی ادارے اور انٹرنیشنل میڈیا بھارت کے مکر و فریب کو جان چکے ہیں۔
پاکستان نے ہمیشہ ذمہ داری کا مظاہرہ کرتے ہوئے امن کو ترجیح دی ہے اور دہشتگردی کے خلاف مؤثر اقدامات کیے ہیں جنہیں عالمی سطح پر تسلیم کیا جا رہا ہے۔ پاکستان اپنی خودمختاری، وقار اور سلامتی پر کسی قسم کا سمجھوتہ نہیں، اور کسی بھی مہم جوئی کا بھرپور جواب دینے کی صلاحیت رکھتا ہے، معرکہ حق کے بعد بھارت کو بخوبی علم ہے کہ پاکستان کا دفاع کس قدر مضبوط اور ناقابل تسخیر ہے۔وزیر اطلاعات آزاد کشمیر نے بھارت میں اقلیتوں کی صورتحال پر تشویش کا اظہار کرتے ہوئے کہا کہ مسلمانوں اور دیگر اقلیتوں کے ساتھ روا رکھا جانے والا سلوک عالمی برادری کے لیے لمحہ فکریہ ہے۔ مسئلہ کشمیر ایک تسلیم شدہ بین الاقوامی تنازع ہے اور اس کے حل کے بغیر خطے میں پائیدار امن ممکن نہیں۔ بھارت موجودہ حالات سے سبق سیکھے، اشتعال انگیزی ترک کرے اور کشمیری عوام کو ان کا جائز حق خودارادیت دے، یہی خطے میں دیرپا امن کی واحد ضمانت ہے۔
فالس فلیگ درحقیقت ایک عسکری اصطلاح ہے اور یہ آپریشن جنگی حکمت عملی کا ایک حصہ ہوتا ہے۔ اس سے مراد ایک ایسا حملہ ہوتا ہے جس کا الزام اپنے کسی دشمن کے سر تھوپ دیا جاتا ہے۔ اکثر ممالک میں خفیہ ایجنسیاں اپنے ہی عوام یا اپنی سرزمین پر ایسا کوئی حملہ کرتی ہیں جس کا الزام اپنے دشمن ملک یا اس کی فوج اور ایجنسیوں پر لگا دیا جاتا ہے جس کا مقصد انہیں موردِ الزام ٹھہرا کر اقوام عالم میں انہیں بدنام کرنا ہوتا ہے۔ بدلے میں عالمی رائے عامہ میں اپنے لیے نرمی اور ہمدردی کے جذبات ابھار ے جاتے ہیں۔پہلگام واقعہ کی بات کی جائے تو ایک دشوار گزار علاقے میں جہاں گھوڑوں اور خچروں کے سوا کسی سواری کا جانا ممکن نہیں ہے’ وہاں دہشت گرد کیسے پہنچ گئے؟ چار سو سے زائد سیاحوں کی سکیورٹی کے لئے ایک بھی اہلکار موقع پر موجود نہ تھا جبکہ بھارتی آرمی کا بیس کیمپ پاس ہی موجود ہے۔ اس کے علا وہ اپنے ٹارگٹ ملک کے خلاف جارحانہ حکمت عملی کو اس طرح عملی جامہ پہنایا جاتا ہے کہ اس کے حق میں کوئی بھی آواز نہ اٹھا سکے۔ بھارت کی تاریخ فالس فلیگ آپریشن سے بھری پڑی ہے۔ بھارت کو جب کبھی عالمی حمایت کی ضرورت درپیش آتی ہے یا کوئی اور مقصد حاصل کرنا ہوتا ہے تو اپنے علاقوں پر حملہ کرانے حتیٰ کہ اپنے فوجی مروانے سے بھی دریغ نہیں کیا جاتا۔
٭٭٭

متعلقہ خبریں