کواڈ اجلاس اور ٹیرف مسائلکواڈ اجلاس اور ٹیرف مسائل

حمیداللہ بھٹی

مسلسل سات برس تک مودی شنگھائی تعاون تنظیم کے اجلاسوں میں شرکت سے گریزاں رہے ، مگر حالیہ دوروزہ اجلاس میںشرکت کی غرض سے چینی شہرتیانجن جاپہنچے۔ یہ شرکت عالمی تبدیلیوں پر نظر رکھنے والوں کے لیے غیر متوقع نہیں تھی ۔البتہ روسی صدرپوتن اور چینی صدرشی جن پنگ سے ظاہری قُربت نے بہت سوں کو چونکایا ہے۔ پوتن سے خوشگوار ماحول میں چہل قدمی کرتے ہوئے مودی کا چینی صدر کے پاس جانا اور تینوں کی گفتگوکوایسارنگ دینا جیسے کوئی اہم مشاورت ہورہی ہو سے دراصل مودی کا ٹرمپ کو پیغام تھاکہ دیکھ لیں ہمارے پاس آپ کا متبادل ہے ،یہ پیغام امریکہ نے سمجھ لیا جس کی تصدیق ٹرمپ کے اُس بیان سے ہوئی کہ ہم نے چین کے ہاتھوں روس اور بھارت کوکھو دیا ہے۔ مگر فوجی پریڈ میں عدم شرکت سے واضح ہوگیاکہ حالات ویسے نہیں جیسارنگ دیاگیا۔ انھی سطور میں لکھاجا چکا کہ بھارت اور امریکہ فطری اتحادی ہیں۔یہ زیادہ دیرایک دوسرے سے الگ رہ ہی نہیں سکتے۔ مودی جیسے چہیتے کا نخرے دکھاناایسے قیاس کی تصدیق ہے۔ شنگھائی تعاون تنظیم کے اجلاس میں شرکت کی طرح اقوامِ متحدہ کی جنرل اسمبلی میں عدم شرکت کافیصلہ بظاہر غیر معمولی ہے جن کے جلد اثرات سامنے آسکتے ہیں ٹرمپ نے رواں برس کے آخرپر کواڈ اجلاس میں شرکت کی غرض سے بھارت آنا تھا مگراب وہ نہیں آرہے اِس سفارتی دھچکے کے جواب میں ہی مودی نے جنرل اسمبلی کے جلاس میں عدم شرکت کافیصلہ کیا جس کے نتائج زیادہ دیر پوشیدہ نہیں رہیں گے اور کواڈ اجلاس سمیت ٹیرف مسائل حل کرنے کی بنیاد بن سکتے ہیں۔
اقوامِ متحدہ کی جنرل اسمبلی کا اجلاس شنگھائی تعاون تنظیم سے زیادہ اہم ہے کیونکہ عالمی سربراہانِ مملکت سے ملاقاتوں کے مواقع ملتے ہیں۔ ہر سربراہ مملکت کی خواہش ہوتی ہے کہ جنرل اسمبلی کے اجلاس میں لازمی شرکت کرے مگر مودی نے یہ نادر موقع دانستہ طور پر کھو دیا جس کی ایک وجہ تو پاکستانی وزیرِ اعظم سے پہلے خطاب کرنا ہوسکتی ہے۔ اس لیے وزیرِ خارجہ جے شنکر کو بھیجنے کا فیصلہ کیاگیا جو 27ستمبر کو بطور 19ویں مقرر خطاب کریں گے جبکہ شہباز شریف 26 ستمبر کو اسرائیلی وزیرِ اعظم نیتن یاہو کے بعد دوسرے مقررہوں گے۔ اگر مودی خود جنرل اسمبلی میں خطاب کے لیے جاتے تو انھیں شہباز شریف سے پہلے خطاب کرناپڑتا ،یوں پاکستان اور بھارت کے درمیان الزامات اور جوابی الزامات کانہ صرف ماحول بنتا مودی کو شاید خدشہ تھاکہ الزامات کا زیادہ بہتر انداز میں جواب دینے سے پاکستان کو بھارت پرکہیں سبقت نہ حاصل ہوجائے اسی بناپر مودی نے عدم شرکت ہی مناسب سمجھی، جبکہ کچھ سفارتی حلقے مودی کے جنرل اسمبلی اجلاس میں عدم شرکت کے دوجوازپیش کرتے ہیں ۔اول: اپنی عادت کے مطابق ٹرمپ کوئی ایسی بات نہ کہہ دیں جس سے مودی کی تضحیک کاتاثربنے دوم: رواں برس مئی کی پاک بھارت جھڑپوں کے دوران بھارتی فضائیہ کے ہونے والے نقصانات کے متعلق عالمی ذرائع ابلاغ کے سوالات نہ سنناپڑیں ۔ ممکن ہے مذکورہ جواز درست ہوں مگرزیادہ قرین قیاس یہ ہے کہ بھارت اپنی اہمیت کے پیشِ نظر نخرے دکھا نے کی روش پر گامزن ہے۔ مودی کو بخوبی معلوم ہے کہ چین کی معاشی و فوجی طاقت کے خلاف امریکہ کی ضرورت بھارت ہے دورے سے گریزپر مودی کی ایسی سفارتی چال اور نفسیاتی حربہ ہیں جو ٹرمپ کو کواڈاجلاس کے طے شدہ دورے کوبحال کے ساتھ ٹیرف مسائل حل کرنے کی طرف اہم قدم ہوسکتاہے۔ لہٰذاٹرمپ رواں برس کے آخر پراگر کواڈ اجلاس میں شرکت کے لیے بھارت آجائیں اور پچاس فیصدٹیرف کونصف کردیں تو حیرانگی نہیں ہو گی ۔
بھارت میں مودی کا سیاسی جادو دم توڑچکا ۔اُن کے لیے مشکلات بڑھنے کی وجہ یہ ہے کہ اپوزیشن نے دھاندلی کے کچھ ایسے ناقابلِ تردید ثبوت پیش کردیے ہیں جن سے ثابت ہو تا ہے کہ مودی وہ نہیں جو نظر آتے ہیں۔ کھوئے عوامی اعتماد کوبحال کرنے اور ناقابلِ شکست ہونے کا تاثردینے کی مودی کی تمام چالیں ناکامی سے دوچار ہوتی جارہی ہیں ۔کسی بیرونی طاقت کے آگے کمزوری کی صورت میں اپوزیشن کو مزید باتیں بنانے کا موقع مل سکتاہے۔ اسی لیے تو پاک بھارت جنگ کے خاتمے میں ٹرمپ کردار کوبھی تسلیم نہیں کررہے جوخفگی کی ایک اہم وجہ ہے۔ رواں برس سترہ جون کے بعد سے ٹیلی فون پربھی گفتگو نہ کرنے میں یہ احتیاط ہے کہ ٹرمپ کو کوئی ایسا موقع نہ دیاجائے جسے بنیاد بنا کروہ ذرائع ابلاغ کوکسی قسم کی کہانی سنا سکیں لیکن گریز کا مطلب امریکہ اور بھارت کے درمیان اختلاف لینادرست نہیں۔
ٹرمپ نے مودی کو رواں ہفتے اپنا دوست قرار دیا جس کا مودی نے خیر مقدم بھی کیا۔اِس کے باوجود جے شنکر کو بھجنے کافیصلہ باعث تعجب ضرورہے مگراِس طرح امریکی صدر سے ملاقات کاامکان نہیں رہانیزامریکی صدر کو پیغام ملے گاکہ آپ کو اگر ہمارامہمان بنناناپسندہے تو ہمیں بھی کہیں جانے کاکوئی شوق نہیں۔ حالانکہ مودی بخوبی جانتے ہیں کہ بھارت ا گرامریکہ کی ضرورت ہے تو بھارتی معیشت کے لیے امریکہ بھی ناگزیر ہے۔ اِس لیے جنرل اسمبلی اجلاس میں عدم شرکت کو ایک قسم کا کچھ لو کچھ دو کی طرف اِشارہ بھی کہہ سکتے ہیں۔ روسی تیل و اسلحہ خریدناتوایک بہانہ ہے، اصل بات امریکہ سے تجارت میں بھارت کوحاصل غیر معمولی برتری ہے جونہی یہ معاملات طے ہوئے تومودی ہو یا کوئی اور، دونوں ممالک میں ازسرِ نو گاڑھی چھننے لگے گی۔
اپنے حمایتی طبقات کااعتمادبحال نہ رکھنے کے علاوہ مسئلہ یہ ہے کہ رواں ماہ 17 ستمبر کو مودی 75 سال کے ہوجائیںگے۔ بی جے پی کی سرپرست راشٹریہ سیوک سنگھ کے وضع کردہ کلیے کے مطابق 75 برس کی عمر کے بعدعملی سیاست سے کنارہ کشی لازم ہے۔ اِس کلیے کااطلاق بی جے پی کے تین درجن سے زائدرہنمائوں پر ہو چکا جن میں سابق وزیرِ داخلہ ایل کے ایڈوانی ، سابق وزیرِ خزانہ یشونت سنگھ سمیت مرکزی وزیر اور فکری رہنما مرلی منوہر جوشی جیسے اہم لوگ شامل ہیں ۔مودی کو یقین ہے کہ راشٹریہ سیوک سنگھ نے اگر اقتدار چھوڑنے کا کہہ دیا تو بی جے پی کچھ نہیں کر پائے گی۔ اس لیے جنونی کاتاثرقائم رکھتے ہوئے وہ بھارت کو ایک خالص ہندو ریاست بنانے کے ساتھ خطے کی طاقت بنانے کے ایسے منصوبے پر عمل پیراہیں جو اُن کی سیاسی ناکامیوں کوڈھانپ لے۔ اقتدارواختیارکی ہوس تو انسانی جبلت میں ہے ۔اِس لیے مودی جیسا جنونی سیاسی فائدے کے لیے ہر حدتک جا سکتا ہے ۔بھارت نے اگر خطے کی طاقت بنناہے تو امریکی تعاون وحمایت حاصل کرنا ضروری ہے ۔اسی لیے جنرل ا سمبلی جیسے اہم اجلاس میں نہیں گئے مگر ٹرمپ اور مودی کے درمیان دوری بھارت اور امریکہ کے درمیان دوری تصورنہیں کی جا سکتی۔ لہٰذا دونوں ممالک میں اگرجلدہی باہمی تعاون کی راہ ہموار ہوجائے تو یہ کوئی عجوبہ نہیںہوگا۔

متعلقہ خبریں