آزادی؟

دنیا بھر میں ۳ مئی کو آزادیٔ صحافت کے طور پر منایا جاتا ہے۔ پاکستان سمیت دنیا بھر میں اب یہ مغالطہ حقیقت کے ہم پلہ ہو چکا ہے کہ آزادی کی محافظ قدر دراصل آزادیٔ صحافت میں پوری طرح جلوہ گر ہے۔ چنانچہ آزادیٔ صحافت کے تصور کے تحت فرد کی نجی آزادی کو کچلنے پر کسی کو حیرت تک نہیں ہوتی۔ مگر یہ تو ایک معمولی مغالطہ ہے۔ آزادی کا پورا تصور ہی مغالطے کی پیداوار ہے چہ جائیکہ آزادیٔ صحافت کی بات کی جائے۔ آزادی سے آج مراد دراصل یہ ہے کہ مغربی تصورِآزادی کے تحت آزادی، انسان کی ایک بنیادی قدر ہے۔ اس تصور میں انسان کو یہ تک آزادی نہیں کہ وہ مغربی تصور سے نجات پاکر آزادی کے مفہوم پر غور تک کرسکے۔ جمہوریت بھی اسی مغالطے کی پرورش کرتی ہے۔ مثلاً جمہوریت میں آزادی کا مطلب یہ ہے کہ جمہوریت کے تحت آزادی ۔ اس آزادی کو جمہوریت کے خلاف استعمال نہیں کیا جاسکتا۔ یعنی اس تصورِ آزادی میں جمہوریت کے خلاف سوچنے کی بھی آزادی نہیں۔ ورنہ آپ جہل مرکب کی عجیب وغریب تصویر بن جائیں گے۔
مغربی تصورات کے تحت رائج قومی ریاستوں میں اگر چہ مغربی تصورِآزادی کا رچاؤ بہت زیادہ ہے، مگر درحقیقت یہ تصور بھی عملی مشق میں کافی ادھورا رہتا ہے۔اگر انفرادی آزادی ریاست کی منشاء سے ٹکرا رہی ہو تو پھر اس آزادی کا قومی ریاستوں کے موجودہ ڈھانچے میں بھی کوئی احترام نہیں رہتا۔ ذرائع ابلاغ کے ساتھ بھی یہ مسئلہ درپیش رہتا ہے۔وہ آزادیٔ اظہار کی جس مقدس گائے کو مستقل پالے رکھتا ہے وہ عملی طور پر قومی مفاد کے ساتھ متصادم حالت میں ہمیشہ مذبح خانے میں رہتی ہے۔جدید قومی ریاستوں نے اس گائے کی تکریم کو برقرار رکھتے ہوئے اِسے بہت ہی زبردست طریقے سے سِدھائے رکھا ہے۔ جدید قومی ریاستوں میں ادارے اظہار رائے کی آزادی کو سرمائے کے منتر سے اپنی تحویل میں رکھتے ہیں۔ اور ایک خوبصورت اور طلسماتی مکر میں اِس پورے عمل کو اس طرح جاری رکھتے ہیں کہ یہ آزادیٔ اظہار کے زرق برق ورق میں ہی لپٹا دکھائی دے۔ دراصل سرمایہ اور آزادی میں ایک قدرِ مشترک بھی ہے۔ جس طرح سرمائے کا کوئی ساحل نہیں، اسی طرح آزادی بھی بے کنار ہے۔ سرمایہ اور آزادی کوئی حد قبول نہیں کرتے۔ آزادی کا سرمائے سے مماثل یہی تصور دراصل ذرائع ابلاغ کا ایک عقیدہ ہے۔حالانکہ ذرائع ابلاغ کوئی تحصیل علم کا ذریعہ نہیں یہ بس ایک ترسیل کا نظام ہے۔ جس کی ساری سرگرمیاں سرمائے کے مدار پر جاری رہتی ہیں۔ پھر بھی اس عمل کو ایک تکریم کی حالت میں رکھا جاتا ہے اور اِسے کسی بھی چیلنج سے مبرا باور کرایا جاتا ہے۔ یہ اس لیے نہیں کیا جاتا کہ اس سے معاشرے کی کوئی اخلاقی یا بنیادی اقدار کی حفاظت مقصود ہوتی ہے۔ بلکہ یہ اس لیے کیا جاتا ہے کہ اگر سرمائے کے اس کھیل میں معاشرے کی اخلاقی یا بنیادی اقدار بھی مزاحم ہو تو ذرائع ابلاغ کو اس کے خلاف بروئے کار رکھنے میں کوئی مشکل درپیش نہ رہے۔ ذرائع ابلاغ کی تاریخ اور اس کے کردار کو ذرا سا ٹٹولنے پر ہی اندازا ہوجاتا ہے کہ اس نے سرمائے کے تحفظ کے لیے معاشرتی اقدار کو داؤ پر لگانے میں تامل نہیں کیا ۔ ایسا کبھی نہیں ہوا کہ وہ معاشرتی اقدار کے تحفظ کے لیے سرمائے کو داؤ پر لگانے کے لیے تیار ہوجائے۔ اگر وہ ایسا کرنے میں کوئی انفرادی جتن کرے بھی تو اُس کا شمار مقتولین میں ہوگا۔ ذرائع ابلاغ دراصل منڈی کی ہی ایک جنس ہے۔ اور اِسے منڈی کے ہی اصول پر چلنا ہے۔ مگر منڈی نے اس کے لیے آزادی اظہار کے نام پر تکریم کا ایک زاویہ اس لیے بُن رکھا ہے کہ وہ منڈی کی راہ میں کسی مذہبی یا اخلاقی اقدار کوبھی آڑے نہیں دیکھنا چاہتے۔ اس کے لیے ضروری تھا کہ اظہار کی آزادی کو ایک مکمل ،محیط ناقابل تغیر اورناقابلِ تقسیم قدر باور کرادیا جائے۔ جبکہ مذہب میں اس کی کوئی گنجائش ہی نہیں۔ مذہب میں آزادی مکمل یا محیط تصور نہیں بلکہ خیر ایک مکمل ، محیط ، ناقابل تغیر اور ناقابل تقسیم قدر ہے۔ یہاں آزادی، خیر کی قیمت پر بروئے کار نہیں لاجاسکتی۔ ذرائع ابلاغ جس آزادی کا تقاضا کرتے ہیں وہ خیر کے خلاف بھی بروئے کار آنے کی آزادی ہے۔ یہ آزادیٔ اظہار کا منفی تصور ہے اور یہی تصور دنیا بھر کے ذرائع ابلاغ کا حقیقی تصور ہے۔
درحقیقت 3؍ مئی کے آزادیٔ اظہار کے اس عالمی دن کے موقع پر سنجیدگی سے یہ امر زیرِ غور لانے کی ضرورت تھی اورہے کہ کیا آزادی کا مجرد تصور کوئی مطلق خیر ہے۔ کیونکہ مغربی تصورِ آزادی (جو جمہوریت کی تحویل اور زیادہ گہرائی میں دراصل سرمایہ دارانہ نظام کی ماتحتی میں رہنے والا آزادی کا تصور ہے) دراصل ایک مطلق خیر کا آئینہ دار تصور کیا جاتا ہے۔ اس کے خلاف بغاوت آزادی نہیں بلکہ جرم ہے۔زیادہ وضاحت کے ساتھ اس پر غور کیا جائے تو دراصل سرمایہ دارانہ نظام زندگی کی زمین میں جڑیں رکھنے والا آزادی کا یہ تصور اس قدر گہنایا ہوا ہے کہ اس میں کوئی فرد یہ سوچنے کے بھی قابل نہیں رہ گیا کہ اُس کی نجی زندگی ڈیجیٹل ٹکنالوجی کی مکمل تحویل میں چلی گئی ہے جس نے عملاً اُس کے تمام معمولات کو ہپناٹائز کردیا ہے۔ اس طرح نجی زندگی کے مکمل خاتمے اور ایک مکمل سحر زدہ حیات کے بارے میں یہ باور کرایا جاتا ہے کہ دراصل یہ ایک آزاد زندگی ہے۔ اس کے خلاف سوچنا آزادی نہیں بلکہ بغاوت ہے۔اس تصور آزادی سے نکلا ہوا آزادیٔ اظہار کا تصور کتنا آلودہ اور بے ہودہ ہو سکتا ہے۔ اس پر کچھ کہنے کی ضرورت نہیں۔
پاکستان میں اِن دنوں ڈان لیکس کے حوالے سے جس آزادیٔ اظہار کے تصور کی حفاظت کا عَلم اُٹھا یا گیا ہے۔ اُس میں بحث کا بنیادی نکتہ یہ ہے ہی نہیں کہ کیا یہ خبر چھپ سکتی تھی یا نہیں؟ اس خبر کا قومی مفاد سے کوئی ٹکراؤ تھا یا نہیں؟ یہاں تک کہ کیا یہ خبر درست بھی تھی یا نہیں؟ مغربی تصورِ آزادی میں یہ پہلو کوئی بھی پڑتال نہیں کرسکتا۔چنانچہ ذرائع ابلاغ اس پہلو سے آنے والے چیلنج کا مقابلہ اظہارِ رائے کی آزادی کو سلب کرنے کی کوشش کے طور پر کریں گے۔ یہ بات کتنی درست ہے اور کتنی غلط؟ اس کا تعین آپ خود کرلیں!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

متعلقہ خبریں