ریاست جموں کشمیر کی آزادی جہاد فی سبیل اللہ ہی سے ممکن ہے!

پیر 04 جنوری 2016 ریاست جموں کشمیر کی آزادی جہاد فی سبیل اللہ ہی سے ممکن ہے!

saifullah-khalid

سیف اللہ خالد حزب المجاہدین کے نا ئب امیر ہیں۔ اور تحریک آزادیٔ کشمیر کی توانا آوازہیں۔ حلقہ احباب میں فصاحت اور بلاغت میں اپنا ثانی نہیں رکھتے۔ اللہ کے دین اور آزادی کشمیرکی جدوجہد میں مجاہدانہ اور قائدانہ کردار جو سیف اللہ خالد نے پیش کیا ہے اس کی مثال ملنا مشکل ہے۔ لیور پہلگام اسلام آباد کے ایک کھاتے پیتے گھرانے سے تعلق رکھنے والے58 سالہ مجاہد کمانڈر عامر خان المعروف سیف اللہ خالد ربع صدی سے بھارتی استعمار کے ظلم و جبراور آٹھ لاکھ فوج کے خلاف ڈٹے ہوئے ہیں۔ 1995 سے1999تک ایک ایسا دور بھی آیا جب بھارتی ایجنسیوں کی سرپرستی میں، بھارت نواز کشمیری بندوق برداروں کے کئی گروپ وجود میں آئے اور جن کی آڑ لے کر بھارتی فورسز نے مجا ہدین کے ہمدردوں، قریبی رشتہ داروں اور جماعت اسلامی سے وابستہ افراد و قائدین کا چن چن کر قتل و غارت گری کا بازار گرم کیا، تو اس وقت کئی بڑے بڑے نامی گرامی عسکریت کے شہسوار عافیت کوشی کے لیے گمنام گوشوں کی تلاش میں تھے، حزب المجاہدین کی صف اول کی تمام قیادت تقریباً جام شہادت نوش کرچکی تھی۔ انہی حالات میں سیف اللہ خالد کے نحیف کندھوں پرحزب چیف آپریشنل کی ذمہ داری کا بوجھ ڈالا گیا اور سیف اللہ خالد نے اس بھاری ذمہ داری کو اُٹھاکر ہچکولے کھاتے ہوئی اس کشتی کو ساحل تک پہچانے کی ٹھان لی۔ تاریخ گواہ ہے کہ ان کی قیادت میں، مجاہدین کشمیر پھرمنظم ہو گئے اور بھارتی بندوق برداروں کو پھر چھپنے کی جگہ بھی نہیں ملی۔ بحیثیت آ پریشنل کمانڈر، حزب المجاہدین کو جموں و کشمیرکے طول و عرض میں متحرک اور منظم کیا۔ تیر بہدف کارروائیوں سے حزب المجاہدین بھارتی فوجیوں کے لیے دہشت کی علامت بن گئی۔ غداروں کے لیے زمین تنگ کردی، حالات کے دھارے کو تبدیل کرنے کے لیے وقت نے جس قربانی کا تقاضا کیا۔ سیف اللہ خالد نے خندہ پیشانی سے پیش کرکے اپنے آ پ کو قربانی کا پیکر ثابت کیا، ان کے باغات کاٹے گئے، تیار فصلوں کو لوٹا گیا، گھر جلایا گیا، دو بیٹوں اور ایک بھائی کو شہید کیا گیا، لیکن۔ ۔ ۔ ہر آزمائش سے سرخ رو ہوئے۔ آج کل جموں و کشمیرکے اس حصے میں مقیم ہیں۔ اُن سے وجود ڈاٹ کام نے کشمیر کی تحریک پرخصوصی گفتگو کی ہے جو نذر قارئین ہے۔

سوال:- آپ کا تعلق ایک اچھے کھاتے پیتے گھرانے سے رہا ہے۔ پُرخطر راستے کا انتخاب کیسے کیا؟دو بیٹوں اور ایک بھائی کی شہادت کے باوجود آپ، ہمالیائی چٹان کی طرح ڈٹے ہوئے نظر آرہے ہیں؟ یہ صبر و حوصلہ…… کوئی خاص وجہ؟

جواب:-’’یہ اللہ تبارک و تعالیٰ ہی کا فضل ہے، جسے چاہتا ہے عطا کرتا ہے‘‘۔

موقع غنیمت جان کر، میں بھی گھر کی طرف آنکلا۔ بندو ق جیکٹ کے نیچے چھپاکر کے گھر کے صحن میں پہنچا تو ڈی آئی جی، ایس ایس پی اور ایس ایچ او کو سامنے کھڑے پایا۔ وسیع و عریض گھر کا صحن آرمڈ پولیس،  پولیس، بی ایس ایف اور سی آر پی ایف سے کھچا کھچ بھر ا تھا

جو لوگ بھی اس تحریک (مسلح جدوجہد) سے وابستہ رہے ہیں، وہ کھاتے پیتے گھرانوں سے ہی تعلق رکھتے ہیں۔ میرا تعلق بھی ایک متمول گھرانے سے تھا۔ بچپن اور جوانی عیش و عشرت میں گزاری، لیکن اس دور میں بھی کسی ظالم کا ظلم کسی مظلوم پر میرے لئے ناقابل برداشت ہوتا تھا تو قوم اور ملت پر ظلم کیسے برداشت کرسکتا تھا۔ میرا تعلق ایسے گھرانے سے ہے جو میری پیدائش کے وقت ہی سے تحریک اسلامی (جماعت اسلامی) سے وابستہ تھا۔ والد صاحب جماعت اسلامی کے رُکن تھے اور گھر میں وسیع اسلامی لٹریچر موجود تھا اور پڑھائی کے ساتھ ساتھ میں اس اسلامی لٹریچر سے استفادہ کرتا رہتا تھا۔ والدین کی تربیت کے ساتھ ساتھ جماعت اسلامی کے عظیم بزرگوں محترم سعد الدین صاحبؒ، مولانا احرار صاحبؒ، مولانا حکیم غلام نبی صاحبؒ، محترم سید علی گیلانی صاحب، محترم سلیمان صاحب زالورہؒ اور محترم شیخ غلام حسن صاحب وغیرہ کی تربیت سے بھی فیض حاصل کرنے کی سعادت نصیب ہوئی، کیونکہ ہمارا گھر تحصیل بجبہاڑہ اور تحصیل پہلگام میں جماعت اسلامی کا مرکز رہا ہے، اس لئے اس پُرخطر راستے میں شعوری طور قدم رکھا اور اچھی طرح جانتا تھا کہ یہ راہِ جہاد بہت ساری قربانیوں کی متقاضی ہے۔ جب بیٹے اور بھائی شہادت کے منصب پر فائز ہوئے، تو سورۃ البقرہ کی یہ آیت نظروں کے سامنے آئی ؛ ’’ترجمہ: ہم تمہیں ضرور خوف، بھوک، مال اورجان کے نقصانات اور آمدنیوں کے گھاٹے میں مبتلا کرکے آزمائش کریں گے۔ ان حالات میں جو لوگ صبر کریں اور جب کوئی مصیبت پڑے تو کہیں کہ ہم اللہ ہی کے ہیں اور اللہ ہی کی طرف پلٹ کر جانا ہے‘‘۔

س:جماعت کے ساتھ بھی وابستہ رہے؟

ج :جی۔ ۔ ہاں میں رُکن جماعت ہونے کے ساتھ ساتھ 6سال تک 11ذیلی حلقوں کا مرکزی امیر رہا ہوں۔

س:-آپ نے ہزاروں مجاہدین کی میدان عمل میں قیادت کی ؟کوئی خاص انہونی واقعہ، جسے آپ بیان کرنا پسند کریں گے؟

ج:- میدان کارزار میں ہزاروں ایسے واقعات رونما ہوئے، جہاں اللہ تعالیٰ کی مدد و نصرت صاف نظر آتی تھی۔ میرے ساتھ بھی درجنوں واقعات ایسے ہوئے جہاں عقل لب بام رہی اور عشق نے چھلانگ لگائی۔ طوالت سے بچتے ہوئے صرف ایک واقعہ مثال کے طور پر عرض کروں گا:

1994ء میں حزب المجا ہدین کا ڈسٹرکٹ کمانڈر تھا اور دشمن کو کافی مطلوب تھا۔ ایک کارروائی میں دشمن کا کافی جانی نقصان ہوا۔ ردعمل میں میرے گھر سے سارا مال و اسباب دشمن نے اپنی گاڑیوں میں بھر کر لوٹ لیا۔ میرے والد بزرگ نے عدالت میں ایک خلاف کیس دائر کیا۔ عدالت نے ڈی آئی جی پولیس کی قیادت میں تحقیقات کے لئے ایک کمیشن تشکیل دیا۔ جس دن یہ کمیشن ہمارے گھر تحقیقات کے لئے آیا، اُس دن میں بھی اپنے ہی گاؤں میں کسی اور جگہ اکیلا بیٹھا ہوا تھا۔ چونکہ مجھے معلوم نہیں تھا کہ ڈی آئی جی کی قیادت میں کمیشن بنایا گیا ہے میں سمجھا کہ تھانے کے کچھ پولیس اہلکار ایس ایچ او کی قیادت میں آئے ہوئے ہیں۔ ایس ایچ او سے متعلق اس سے پہلے بھی کچھ تحریک مخالف شکایات موصول ہوئی تھیں، موقع کو غنیمت جان کر، میں بھی گھر کی طرف آنکلا۔ بندو ق جیکٹ کے نیچے چھپاکر کے گھر کے صحن میں پہنچا تو ڈی آئی جی، ایس ایس پی اور ایس ایچ او کو سامنے کھڑے پایا۔ وسیع و عریض گھر کا صحن آرمڈ پولیس، پولیس، بی ایس ایف اور سی آر پی ایف سے کھچا کھچ بھر ا تھااور میں سامنے بلا مبالغہ اللہ کے فضل سے بغیر کسی خوف اور ڈر کے کھڑا تھا۔ ایس ایس پی، ایس ایچ او اور پولیس اہلکارایک ایک کرکے ڈی آئی جی کی نظروں سے بچتے ہوئے مجھے سیلوٹ دے رہے تھے اور ڈی آئی جی کے چہرے پر ڈر اور خوف کی وجہ سے زردی چھا گئی۔ ہکا بکا کبھی میری طرف اور کبھی میرے لٹے ہوئے مکان کی طرف دیکھ رہا تھا اور بغیر مزید کوئی کارروائی کرکے کر اپنی فوج ظفر موج جن کی تعداد80 سے85 تک تھی کے ساتھ نکل گیا۔ بعد میں ڈی آئی جی کو اسی بنیاد پر معطل کیا گیا کہ آپ نے سیف اللہ خالد کو مارا یا گرفتار کیوں نہیں کیا۔ حالانکہ گرفتار کرنا یا شہید کرنا اُس وقت اُن کے لئے بہت آسان تھا۔ آج بھی یہ واقعہ میرے ذہن میں کبھی گونجتا ہے تو سورہ الانفال کی اس آیت پر نظر پڑتی ہے؛ ’’ترجمہ: ان کافروں (دشمنوں)کے دلوں میں رعب ڈالے دیتا ہوں‘‘۔

س:- آپ کے خاندان پر کیا بیتی اور کیا بیت رہی ہے۔ کچھ فرمانا پسند کریں گے؟

ج:- اہل حق پر جو کچھ بیتی ہے، اس کا عشر عشیر بھی مجھ پر نہیں بیتی ہے۔ بیٹوں اور بھائی کی شہادت آنکھوں کے سامنے، باغات کو کاٹنا، فصل کو لوٹنا، دو مکانات کو بارود سے زمین بوس کرنا، ۳۰ افرادِ خانہ کی جلا وطنی، باپ بھائیوں اور رشتہ داروں کو انسانیت سوز ٹارچر، جائیداد کو ضبط کرنا، یہ سب کچھ دیکھا اور آج بھی میرے گھر والوں کو بہت کچھ سہنا پڑ رہا ہے اور یہ تحریکوں کا خاصہ ہے اور اللہ کے دربار میں قبولیت کی دعا کرتے ہوئے وَاسْتَعِیْنُوْ بِاالصَّبْرِ وَالصَّلوٰۃِ کے مصداق کھڑے ہیں۔

جنرل مشرف صاحب کی معذرت خواہانہ، بزدلانہ اور ناقص پالیسی نے نہ صرف مسئلہ کشمیر کو کافی نقصان پہنچایا بلکہ مملکت ِخداداد پاکستان کو بھی نہ ختم ہونے والی دہشت گردی کے دلدل میں پھنسا دیا اور دشمنوں نے کافی فائدہ

 اُٹھایا

س:- کشمیر کے حوالے سے مشرف دور کی کشمیر پالیسی اور آج کی حکومت کی کشمیر پالیسی میں کوئی واضح فرق؟

ج:- جنرل مشرف صاحب کی معذرت خواہانہ، بزدلانہ اور ناقص پالیسی نے نہ صرف مسئلہ کشمیر کو کافی نقصان پہنچایا بلکہ مملکت ِخداداد پاکستان کو بھی نہ ختم ہونے والی دہشت گردی کے دلدل میں پھنسا دیا اور دشمنوں نے کافی فائدہ اُٹھایا۔ پاکستان کی موجودہ عسکری قیادت کی پالیسی فی الحال سابقہ پالیسی سے بہت مختلف اورمثبت نظر آرہی ہے۔ مسئلہ کشمیر ایک بار پھر پاکستان کی خارجہ پالیسی کا مرکزی نکتہ بنتا جا رہا ہے۔ اگر چہ سشما سوراج کے دورہ پاکستان کے بعد کچھ سوالات جنم لے رہے ہیں تاہم گزشتہ کچھ عرصے میں پاکستان نے اس مسئلہ کو بار بار جارحانہ انداز میں بین الاقوامی فورمز پر اُٹھایا ہے۔ حکومت پاکستان کی اس پالیسی کو ہم خاصی اہمیت دیتے ہوئے قابل تحسین سمجھتے ہیں۔ پاکستان کی عسکری قیادت بھی مسئلہ کشمیر کو بھارت اور پاکستان کے مابین تمام تنازعات میں اہم مسئلہ قرار دیتی نظر آرہی ہے اور عسکری قیادت نے بغیر کسی لاگ لپیٹ کے دو ٹوک الفاظ میں مکرر یہ بیانات دیئے ہیں کہ اگر کشمیر کا مسئلہ فوری طور پر جموں و کشمیر کے عوام کی اُمنگوں اور خواہشات کے مطابق حل نہیں کیا گیا تو یہ خرمن امن کو آگ لگانے کا باعث بن سکتا ہے اور مسئلہ کشمیر حل کئے بغیر بھارت کے ساتھ امن قائم نہیں ہوسکتا ہے۔ البتہ یہ کہنا میں ضروری سمجھتا ہوں کہ پاکستان کے اربابِ اقتدار و اختیار پر خواہ سیاسی ہو یا عسکری مجاہدین جموں و کشمیر کے ساتھ ساتھ وہاں کے مظلوم و مقہور عوام کا ہر محاذ خواہ سیاسی ہو، سفارتی ہو، اخلاقی ہو یا عسکری سپورٹ کرنا فرض ہے۔

س:- نریندر مودی نے کشمیر کی تحریک آزادی کے بارے میں جو جارحانہ رویہ اختیار کیا ہے، اس کے بارے میں آپ کیا کہیں گے ؟جموں کشمیر میں بی جے پی اور مفتی سعید نے کی مخلوط حکومت کے بارے میں آپ کی رائے کیا ہے؟

ج:- نریندر مودی ایسے دہشت گرد وزیر اعظم ہیں جس کے ناپاک ہاتھ بے گناہ مسلمانوں کے خون سے رنگے ہوئے ہیں اور واقعی وہ بھارت کو ہندو دیش میں تبدیل کرنا چاہتا ہے۔ بھارت کے جو مسلمان ہندوؤں سے زیادہ ہندوستانی تھے، اُن سے بھی آج کہا جا رہا ہے کہ پاکستان بھاگ جاؤ۔ کشمیر کی تحریک آزادی کے بارے میں سابقہ حکومتوں کا بھی جارحانہ رویہ تھا اور آج ذرا اس رویہ میں تیزی آئی ہوئی لگتی ہے کیونکہ بی جے پی اور شیو سینا کا نعرہ ہی یہ ہے ’ہندوستان میں رہنا ہے، رام رام کہنا ہے، ہندو بن کر رہنا ہے وغیرہ۔ اسی رویہ سے ہماری جدوجہد میں اُبال اور اُبھار آئے گا انشاء اللہ اسی جارحانہ رویہ سے آج جموں و کشمیر کے مرد و زن، بچے بزرگ کھل کر بھارتی غاصبانہ قبضہ سے آزادی چاہتے ہیں۔ بی جے پی اور پی ڈی پی کی مخلوط حکومت ہو یا نیشنل کانفرنس اور کانگریس کی یا اور کسی اتحاد کی، سب ایک ہی تھیلے کے چٹے بٹے ہیں اور بھارت کے ناپاک منصوبوں اور خاکوں میں اپنی لیلیٰ ٔاقتدار کی خاطر رنگ بھر رہے ہیں اور ہر کوئی جموں و کشمیر کے مظلوم عوام کے سینوں پر ظلم، جبر اور قہر کا مونگ دل رہا ہے۔

س:- کا نٹے کو کانٹے سے نکالا جائے گا یہ بیان بھارتی وزیر دفاع منوہر پاری کر کا حال ہی میں آیا ہے۔۔ آپ اس بیان کوکس طرح لے رہے ہیں؟

ج:- یہ کوئی نئی بات نہیں ہے۔ منوہر پاریکر سے پہلے بھی بھارتی نیتا اور عسکری تھنک ٹینکس (Think Tanks) یہ نسخہ جموں و کشمیر میں آزما چکے ہیں کہ ہم دہشت گردی کا مقابلہ دہشت گردی سے کریں گے۔ 1995ء سے لیکر 1997ء تک مسلم مجاہدین اور اخوانیوں کے لباس میں ان زرخرید ایجنٹوں کے ذریعے اسی منصوبے پر عمل پیرا ہوئے تھے۔ اس پر مستزاد اپنے فوجیوں کو بھی سادہ لباس میں اس پلان کی تکمیل کرنا چاہتی تھی لیکن اللہ کی تائید اور مدد سے سربکف مجاہدین نے اپنی تیر بہدف کارروائیوں سے اس منصوبے کو بیخ و بن سے اُکھاڑ کر ان کے منصوبے پر پانی پھیر دیا ہے اور اُن دہشت گردوں اور اُن کے کمانڈروں کو کیفر کردار تک پہنچایا۔ میں بھی یہ عرض کرنا ضروری سمجھتا ہوں کہ بزدل ہمیشہ اوچھے ہتھکنڈوں اور ہتھیاروں سے حملہ کرتا ہے۔ یہ بھارتی فوج اور منوہر پاریکر کی کھلی ناکامی ہے۔ یہ اُس ہیجڑے کی مثال کے مترادف ہے، جب وہ کسی کو گالی دیتا ہے کہتا ہے میرا بھائی آپ کو ویسا اور تیسا کرے۔ خود وہ اس سے قاصر ہوتا ہے۔ ۱۹۶۷ء کے ترجمان القرآن میں مولانا سید ابوالاعلیٰ مودودیؒ فرماتے ہیں کہ ’’جب بھارت میں مکمل رام راج قائم ہوگا، تو اُس وقت پاکستان اسلامی پاکستان بن جائے گا اور بھارت میں مظلوم مسلمان آزاد ہو جائیں گے۔

س:- نائن الیون کے بعد دنیا بدل گئی ہے، بدلے ہوئے حالات کا آپ کس طرح سامنا کررہے ہیں؟

ج:- نائن الیون 9/11 کو امریکا نے ورلڈ ٹریڈ سینٹر پر مجاہدین کے حملے کا ڈرامہ رچاکر عراق اور افغانستان پر حملہ کرنے کی جو راہ ہموار کی تھی اور نیٹو کے26ممالک کو جدید ٹیکنالوجی سے لیس اپنے ساتھ ملایا تھا، دنیا کے سامنے نہ صرف ایکسپوز ہوا بلکہ ہر محاذ پر اس کو ناکامی کا منہ دیکھنا پڑا۔ دفاعی بجٹ میں سو فیصداضافے کی وجہ سے امریکا قرض تلے دب چکا ہے۔ بڑے بڑے بینک اور فیکٹریاں دیوالیہ ہوچکی ہیں۔ بڑے بڑے پلازے خالی ہوگئے ہیں۔ عراق اور افغانستان سے ذلیل و رسوا ہوکر نکل چکا ہے۔ طالبان سے مذاکرات کی بھیک مانگنے پر مجبور ہوا۔ نائن الیون کے بعد دنیا بھر کی جہادی تحریکیں پروان چڑھی ہیں۔ سامراجی اور طاغوتی طاقتیں بظاہر خوبصورت اور حسین نظر آرہی ہیں لیکن ان کے اندر کے زخموں سے تعفن اُٹھ رہا ہے جو پورے ماحول کو گندہ اور پلید کر رہا ہے۔ اللہ کے فضل و کرم سے ہماری مبنی برحق جدوجہد بھی اپنے منطقی منزل کو پہنچ جائے گی۔ ان شاء اللہ

س:- بعض دانشوروں اور اہل عقل کی رائے ہے کہ موجودہ عالمی تناظر میں مقبوضہ کشمیر میں اب عسکریت کی گنجائش نہیں رہی ہے۔ آپ کی کیا رائے ہے؟

ج:- میں بڑے ادب و احترام کے ساتھ ایسے دانشوروں اور اہل عقل کی رائے پر ماتم کرتا ہوں جو کہتے ہیں کہ موجودہ عالمی منظر نامے میں مقبوضہ جموں و کشمیر میں اب عسکریت کی گنجائش نہیں رہی ہے۔ کیا وہ نہیں جانتے ہیں کہ42 سالہ پُرامن جدوجہد کی ناکامی کے بعد ہم نے مسلح جدوجہد شروع کرکے مسئلہ کشمیر جو اقوام متحدہ کے سرد خانے میں پڑا ہوا تھا، عالمی فلیش پوائنٹ بنایا ہے۔ ایسے ہی اہل دانش اور اہل عقل عراق، افغانستان، فلسطین اور جموں و کشمیر میں سامراجی طاقتوں کی سرکاری دہشت گردی کو جواز فراہم کرتے ہیں۔ جس دہشت گردی میں لاکھوں بے گناہ انسانوں کو لقمۂ اجل بنایا گیا اور کھربوں ڈالر کی جائیدادوں کو خاکستر، سینکڑوں بستیوں کو تاخت و تاراج اور چادر اور چار دیواری کو پامال کر دیا گیا۔ دنیا کے دوسرے اقوام کے مسائل کو آنِ واحد میں حل کیا گیا(مشرقی تیمور، جنوبی سوڈان) کیونکہ وہ مسلمانوں کا نہیں عیسائیوں کا مسئلہ تھا۔ Diamond cuts Diamond کے مصداق عسکری غرور کو عسکری جدوجہد ہی سے ختم کیا جا سکتا ہے۔ پاک بھارت کے مابین150مرتبہ مذاکرات ہوئے لیکن نتیجہ ’کھودا پہاڑ نکلا چوہا‘ کے مصداق 2008ء، 2009ء اور2010ء کی فقید المثال پُرامن احتجاجی ریلیاں، جلسے اور جلوس لیکن drop seen انتہائی مایوس کن اور حوصلہ شکن۔ مولانا سید ابو الااعلیٰ مودودیؒ نے ۱۹۶۵ء میں فرمایا ہے کہ مسئلہ کشمیر صرف جہاد سے حل ہوگا اور بھارت کا غرور مسلح جدوجہد ہی سے پیوند خاک ہوگا ان شاء اللہ۔ مسلمانوں کا کوئی بھی جائز مسئلہ مذاکرات یا بات چیت سے حل ہوا ہے نہ ہوگا۔ مسئلہ کا ایک ہی حل․․․ الجہاد۔

س:- کنٹرول لائن پر باڑ ھ لگا دی گئی ہے، مجاہدین کی نقل و حرکت پر قدغن ہے، ان حالات میں جہاد کشمیر کا آپ کیا مستقبل دیکھ رہے ہیں؟

ج:- بھارتی فوج کے افسروں اور اُن کے فوجیوں سے ہم نے ماضی میں بھی بہت سارے ہتھیار اور گولہ بارود خریدا ہے اور خریدتے ہیں اور آج بھی وہ عمل جاری ہے۔ اس کے ساتھ ساتھ ہمارے سربکف مجاہدین بھارتی بزدل فوجیوں اور ٹاسک فورس کے نا اہل سپاہیوں سے ہتھیار چھینتے ہیں۔ 2013ء سے لیکر آج تک ہمارے مجاہدین نے فوجیوں سے73کلاشنکوف اوردس انساس (Insaas) رائفلیں چھین لی ہیں اور بھی بہت سارے ذرائع سے مجاہدین تک سامان حرب و ضرب پہنچا رہے ہیں۔

س:- دنیا بھر میں آزادی کی تحریکوں نے فدائی حملوں سے قابض افواج کے مورال کو کافی حد تک گرایا ہے، لیکن آپ کی تنظیم فدائی حملوں کو جائز نہیں سمجھتی ہے۔ کیوں؟

ج:- ہماری تنظیم فدائی حملوں کو ناجائز نہیں سمجھتی ہے۔ ہمارے مجاہدین میدان کارزار میں اپنے سروں پر کفن باندھے کیل کانٹے سے لیس ۸ لاکھ بھارتی فوجیوں کا مقابلہ کر رہے ہیں۔ یہ مجاہدین فدائی نہیں تو اور کیا ہیں۔ فدائی اور خودکش میں واضح فرق ہے۔ خودکشی کے ہم مخالف ہیں اس لئے کہ یہ زندگی سے اورمصائب سے تنگ آکر کی جاتی ہے، جبکہ فدائی دشمن کو بہت زیادہ نقصان پہنچا کر بچ نکلنے میں کامیاب بھی ہو جاتا ہے۔ 1999ء میں نتونسہ ہندوارہ میں بریگیڈ کیمپ میں فدائی حملہ کرکے ہمارے مجاہدین نے کیمپ ہی کو تباہ و برباد کر دیا۔ بجبہاڑہ اسلام آباد میں1992ء میں دو بنکروں پر حملہ کرکے دونوں کو تباہ و برباد کرکے ۱۲ فوجیوں کو واصل جہنم کر دیا۔ تُرمکھ لولاب میں1999ء میں ہمارے فدائین نے فوجی کیمپ کو اُڑا دیا۔ ٹنکی پورہ ڈاروسہ فوجی کیمپ پر ہمارے فدائی مجاہدین نے حملہ کرکے پورے فوجی کیمپ کو تباہ کر دیا۔

س:- عام تاثر یہ ہے کہ پاکستان تحریک کشمیر سے مخلص نہیں، باربار کشمیر پالیسی بدل کیوں جاتی ہے؟

ج:- پاکستان مسئلہ کشمیر کا ایک اہم فریق ہے اور پاکستان کی سالمیت اور Integrity کیلئے کشمیر کی آزادی ناگزیر ہے۔ اس مسئلہ کے ساتھ کسی قسم کی سودا بازی یا compromise پاکستان کے لئے انتہائی نقصان دہ ثابت ہوگی۔ سابقہ حکومتوں کے ادوار میں کشمیر پالیسی میں تبدیلیاں لائی گئیں۔ اس کی بنیادی وجہ عالمی دباؤ اور پاکستان کی اندرونی صورت حال رہی ہے۔ عسکری اور سیاسی قیادت دو مختلف ٹریکوں پر چل رہے تھے جس کی وجہ سے مسئلہ کشمیر کو کافی حد تک نقصان پہنچا ہے۔ پاکستان کے 18کروڑ عوام کے مؤقف میں مسئلہ کشمیر کے حوالے سے کبھی تبدیلی آئی ہے نہ آئندہ آسکتی ہے۔

کیا اہلِ دانش نہیں جانتے ہیں کہ42 سالہ پُرامن جدوجہد کی ناکامی کے بعد ہم نے مسلح جدوجہد شروع کرکے مسئلہ کشمیر جو اقوام متحدہ کے سرد خانے میں پڑا ہوا تھا، عالمی فلیش پوائنٹ بنایا ہے

س:- نوے کی دہائی والی حزب المجاہدین اور آج کی حزب المجاہدین۔ ۔ ۔ کوئی فرق محسوس کررہے ہیں؟

ج:- نوے کی دہائی والی حزب المجاہدین اور آج کی حزب المجاہدین میں واضح فرق نظر آتا ہے۔ نوے کی دہائی میں جب مسلح جدوجہد کا آغاز ہوا تو سب سمجھتے تھے کہ آزادی کل یا پرسوں ملے گی۔ بھارت چند دنوں میں کشمیر کو چھوڑ دے گا نہ کوئی ظلم ہوگا نہ مار دھاڑ، گرفتاری ہوگی نہ انٹروگیشن، نہ ٹارچر نہ مخبری، کیونکہ ساراعوام مسلح جوانوں کے پشت پر نظر آرہا تھا۔ مجاہدین قوم کے ہیرو اور مافوق الفطرت سمجھے جاتے تھے۔ مجاہدین کو پھول مالائیں پہنائی جاتی تھیں، وازوان کھلائے جا رہے تھے۔ عسکری لوگوں کے ہاتھوں میں لیل و نہار تھے، عسکریت کا طوطی ہر جگہ بولتا تھا۔ قوم کے نوجوان یہ دیکھ کر بلا سوچے سمجھے شعوری اور غیر شعوری طور اس سیلاب میں بہہ گئے۔ جب بھارت نے ظلم و بربریت کا بازار گرم کر دیا تو وہی جوان مسلح جدوجدہ سے کھسکتے چلے گئے۔ بندوق کو خیر باد کیا، سرندڑ کاگراف بڑھتا چلا گیا، رینی گیڈز وجود میں آگئے۔ اس کے برعکس آج جو مجاہدین ہماری صفوں میں شامل ہیں انہوں نے اسی جدوجہد میں آنکھ کھولی، پروان چڑھے، اتار چڑھاؤ دیکھے، اپنی آنکھوں کے سامنے بھارت کا ظلم دیکھا، معصوم لوگ شہید ہوتے دیکھے، اپنی ماؤں بہنوں اور بیٹیوں کی عصمت کو تار تار ہوتے دیکھیں، بستیوں کی بستیاں خاکستر ہوتے دیکھیں۔ اس سب کچھ کے باوجود انہوں نے یہ پُرخار راستہ سوچ سمجھ کر اختیار کیا۔ اسی لئے آج حزب المجاہدین کی صفوں میں اعلیٰ تعلیم یافتہ، بلند حوصلہ، شہادت کے جذبہ سے سرشار مجاہدین شامل ہیں، جن پر ہمیں فخر اور ناز ہے۔ آج مجاہدین کے اندر سرنڈر کا رجحان ختم ہوچکا ہے، منصوبہ بند کارروائیوں کے ذریعے دشمن کو ناکوں چنے چبوا رہے ہیں۔

س:- مسئلہ کشمیر کے حوالے سے موجودہ حالات میں پاکستان کو کیا کرنا چاہیے، بنیادی پالیسی میں کیا تبدیلی لائی جا سکتی ہے؟

ج:- پاکستان کو سیاسی اور سفارتی محاذ پر اعتماد کے ساتھ جارحانہ انداز میں مسئلہ کشمیر کو عالمی فورموں میں اُٹھانا چاہئے۔ بھارت کشمیریوں پر جو ظلم و ستم ڈھا رہا ہے، اس کو پرنٹ اور الیکٹرانک میڈیا کے ذریعے دنیا کے سامنے اجاگر کرکے بھارت کو ایکسپوز کروانا چاہئے۔ بھارت نے پاکستان کو دو لخت کرنے کیلئے جو کردار1971ء میں مشرقی پاکستان میں ادا کیا، حالانکہ بھارت کیلئے کوئی جواز نہیں بنتا تھا کہ وہ مشرقی پاکستان میں اپنی فوج مکتی باہنی کے لباس میں داخل کرکے بنگلہ دیش معرض وجود میں لاتا۔ پاکستان کو یہی کردار کشمیر میں ادا کرنا چاہئے، کیونکہ پاکستان مسئلہ کشمیر کا اہم اور بنیادی فریق ہے۔ 68 سال گزرنے کے باوجود بھارت اور اقوام متحدہ کشمیریوں سے کیے گئے وعدے کو نبھانے میں ناکام ہوچکے ہیں۔ جہاں سیاسی اور سفارتی محاذ پر پاکستان کو مسئلہ کشمیر کے حوالے سے حمایت کرنی چاہئے، وہاں عسکری محاذ پر بھی مجاہدین کشمیر کا بھرپورساتھ دینے سے جی نہیں چرانا چاہئے۔ معذرت خواہانہ انداز کو چھوڑ کر جارحانہ انداز اختیار کرنا چاہئے، کیونکہ لاتوں کے بھوت باتوں سے نہیں مانتے ہیں۔

س:- ناں ناں کر کے، بھارتی قیادت نے مذاکرات کی ہاں کر دی۔ سشما سوراج بھی آئی اور چلی گئیں۔ ۔ ۔ ان مذاکرات کو آپ کس نظر سے دیکھتے ہیں۔ کیا دو طرفہ مذاکرات سے مسئلہ کشمیر کا حل نکالا جا سکتا ہے؟

ج:-میں پہلے ہی عرض کرچکا ہو ں کہ مذاکرات کی میز آج تک بہت بار سجائی گئی ہے۔ وزرائے اعظم، وزرائے خارجہ اور خارجہ سیکرٹریز کی سطح تک مذاکرات ہوتے ہیں لیکن کوئی خاطر خواہ مثبت نتیجہ نہیں نکلا ہے کیونکہ بھارت سنجیدہ اور مخلص تھا نہ ہے اور نہ ہوگا۔ وہ صرف دنیا کی آنکھوں میں دھول جھونکنے کیلئے کر رہا ہے۔ سشما سوراج آئے یا اور کوئی، توقع رکھنا وقت کا زیاں اور خود فریبی ہے۔ مسئلہ کشمیر سلامتی کونسل کی قراردادوں کے مطابق یا جموں و کشمیر کے عوام کی خواہشات اور اُمنگوں کے مطابق حل ہونا چاہئے۔ یہ کسی قطعہ زمین کا مسئلہ نہیں ہے بلکہ ڈیڑھ کروڑ انسانوں کی تقدیر کا مسئلہ ہے اور مذاکرات میں جموں و کشمیر کی مسلمہ قیادت بنیادی اور اہم فریق کی حیثیت رکھتی ہے۔

س:- کیا آپ اب بھی یہی سمجھتے ہیں کہ کشمیر جہاد سے آزاد ہو گا یا آپ کو کوئی متبادل صورت بھی نظر آرہی ہے؟

ج: میرا راستہ تو جہاد ہے مجھے آج بھی یقین ہے کہ ریاست جموں کشمیر کی آزادی جہاد فی سبیل اللہ ہی سے ممکن ہے۔ اگرچہ تحریک آزادی میں سیاست اور سفارتی محاذ کا اپنا

کرداراور افادیت ہے لیکن بیرونی فوجی قبضہ سوائے مسلح جدوجہد کے نہ کبھی ختم ہوا ہے ا ور نہ ہی مقبوضہ کشمیر میں ختم ہوتا نظر آتا ہے۔ ہم اس نتیجے پر پہنچے کہ غلام کا کوئی ووٹ نہیں ہوتا، لہٰذا غلامی کے بندھن توڑنے کے لیے قوم کی متحدہ جدوجہد ناگزیر ہے۔ اگر متحدہ قیادت کے زیر سایہ ریاست گیر اورمنظم مسلح جدوجہد ہوگی، توانڈیا کشمیر سے بہت جلد نکل جائے گا۔