سمت !

ب نقاب /ایم آر ملک

سقراط نے زہر کا پیالہ پیا تو ایتھنز کے حکمرانوں نے سکھ کا سانس لیا کہ اُن کے نوجوانوں کو گمراہ کرنے والا جہنم رسید ہوا، یونان کی اشرافیہ
جیت گئی، سقراط کی دانش ہار گئی۔ وقت گزر گیا۔اسکاٹ لینڈ کی جنگ آزادی لڑنے والے دلاور ولیم والس کو جب انگلینڈ کے بادشاہ ایڈورڈ
اوّل نے گرفتار کیا تو اُس پر غداری کا مقدمہ قائم کیا، اسے برہنہ کرکے گھوڑوں کے سموں کے ساتھ باندھ کر لندن کی گلیوں میں گھسیٹا گیا اور
پھر ناقابل بیان تشدد کے بعد اُسے پھانسی دے کر لاش کے ٹکڑے ٹکڑے کر دیے گئے۔ اُس وقت کا بادشاہ جیت گیا، ولیم والس ہار گیا۔
وقت گزر گیا۔
جیورڈانو برونو پر بھی چرچ کے عقائد سے انحراف کرنے کا مقدمہ بنا یاگیا، برونو نے اپنے دفاع میں کہا کہ اس کی تحقیق عیسائیت کے عقیدہ خدا اور اُس کی تخلیق سے متصادم نہیں مگر اُس کی بات نہیں سنی گئی اور اسے اپنے نظریات سے مکمل طور پر تائب ہونے کے لیے کہا گیا، برونو نے انکار کر دیا، پوپ نے برونو کو کافر قرار دے دیا، 8فروری1600ء کو جب اسے فیصلہ پڑھ کر سنایا گیا تو برونو نے تاریخی جملہ کہا ”میں یہ فیصلہ سنتے ہوئے اتنا خوفزدہ نہیں ہوں جتنا تم یہ فیصلہ سناتے ہوئے خوفزدہ ہو”۔برونو کی زبان کاٹ دی گئی اور اسے زندہ جلا دیا گیا۔ پوپ جیت گیا، برونو ہار گیا۔ وقت گزر گیا۔
کربلا میں حسین ابن علی اکیلے تھے اور سامنے یزید کا لشکر انہیں بیعت کرنے کا کہہ رہاتھا۔ حضرت حسین نے انکار کر دیا۔ عبیداللہ ابن زیاد نے ظلم و بربریت کا قہر برپا کر دیا کیا ۔نوجوان کیا بچے کیا بزرگ سب درندگی کا شکار ہوئے خواتین اسیر بنا لی گئیں۔
حجاج بن یوسف جب خانہ کعبہ پر آگ کے گولے پھینک رہا تھا تو اُس وقت ابن زبیر نے جوانمردی کی تاریخ رقم کی، انہیں مسلسل ہتھیار
پھینکنے کے پیغامات موصول ہوئے مگر آپ نے انکار کردیا، اپنی والدہ حضرت اسما سے مشورہ کیا، انہوں نے کہا کہ اہل حق اس بات کی فکر نہیں
کیا کرتے کہ ان کے پاس کتنے مددگار اور ساتھی ہیں، جائو تنہا لڑو اور اطاعت کا تصور بھی ذہن میں نہ لانا، ابن زبیر نے سفاک حجاج بن
یوسف کا مقابلہ کیا اور شہادت نوش فرمائی، حجاج نے آپ کا سر کاٹ کر خلیفہ عبد المالک کو بھجوا دیا اور لاش لٹکا دی، خود حضرت اسما کے پاس پہنچا
اور کہا تم نے بیٹے کا انجام دیکھ لیا، آپ نے جواب دیا ہاں تو نے اس کی دنیا خراب کر دی اور اُس نے تیری عقبیٰ بگاڑ دی۔ حجاج جیت گیا، ابن
زبیر ہار گئے۔ وقت گزر گیا۔
ابو جعفر منصور نے کئی مرتبہ امام ابو حنیفہ کو قاضی القضاة بننے کی پیشکش کی مگر آپ نے ہر مرتبہ انکار کیا، ایک موقع پر دونوں کے درمیان تلخی
اس قدر بڑھ گئی کہ منصور کھلم کھلا ظلم کرنے پر اُتر آیا، اُس نے انہیں بغداد میں دیواریں بنانے کے کام کی نگرانی اور اینٹیں گننے پر مامور کر دیا،
مقصد اُن کی ہتک کرنا تھا، بعد ازاں منصور نے امام ابوحنیفہ کو کوڑے مارے اور اذیت ناک قید میں رکھا، قید میں ہی انہیں زہر دے کر مروا دیا
گیا، سجدے کی حالت میں آپ کا انتقال ہوا، نماز جنازہ میں مجمع کا حال یہ تھا کہ پچاس ہزار لوگ امڈ آئے، چھ مرتبہ نماز جنازہ پڑھی گئی۔
منصور جیت گیا، امام ابو حنیفہ ہار گئے۔ وقت گزر گیا۔
ذوالفقار علی بھٹو کل کی بات ہے، جب مارشل لا لگایا گیا بھٹو کو قید کیا گیا۔ عبرت کی مثال بنانے کی دھمکیاں دیں تب بھٹو اور ضیاالحق کے
درمیان صلح کی کوششیں کیں گئی مگر شاہنواز بھٹو کے فرزند نے کسی نامعلوم مولوی کے بیٹے سے ہارنے کی بجائے تاریخ میں زندہ رہنا پسند کیا
کیس چلایا گیا، بے ضمیر ججز کے بینچ نے ان کو پھانسی دے دی۔ ان کے جنازے میں درجن بھر افراد شامل تھے۔ اس وقت آمریت جیت گئی
ضیا جیت گیا بھٹو ہار گیا وقت گزر گیا۔مگر سوال یہ ہے کہ تاریخ میں ہار جیت کا فیصلہ طاقت کی بنیاد پر ہوتا ہے ، یونان کی اشرافیہ سقراط سے زیادہ
طاقتور تھی مگر تاریخ نے ثابت کیا کہ سقراط کا سچ زیادہ طاقتور تھا۔ ولیم والس کی دردناک موت کے بعد اس کا نام لیوا بھی نہیں ہونا چاہئے تھا مگر
آج ابیرڈین سے لے کر ایڈنبرا تک ولیم والس کے مجسمے اور یادگاریں ہیں، تاریخ میں ولیم والس امر ہو چکا ہے۔ برونو کو زندہ جلانے والے
بھی آج یہ بات مانتے ہیں کہ برونو کا علم اور نظریہ درست تھا اور اسے اذیت ناک موت دینے والے تاریخ کے غلط دوراہے پر کھڑے تھے۔
کربلا کے شہید کا غم آج پوری انسانیت مناتی ہے پھر وہ مسلمان ہوں یا کافر اور یزید لعین ٹھہرا ۔تاریخ میں حجاج بن یوسف کو آج ایک ظالم اور
جابر حکمران کے طور پر یاد کیا جاتا ہے جس کی گردن پر ہزاروں بے گناہ مسلمانوں کا خون ہے جبکہ حضرت عبداللہ ابن زبیر شجاعت اور دلیری
کا استعارہ ہیں، حجاج کو شکست ہو چکی ہے ابن زبیر فاتح ہیں۔ جس ابو جعفر منصور نے امام ابوحنیفہ کو قید میں زہر دے کر مروایا، اس کے مرنے کے بعد ایک جیسی سو قبریں کھو دی گئیں اور کسی ایک قبر میں اسے دفن کر دیا گیا تاکہ لوگوں کو یہ پتہ نہ چل سکے کہ وہ کس قبر میں دفن ہے، یہ اہتمام اس خوف کی وجہ سے کیا گیا کہ کہیں لوگ اُس کی قبر کی بے حرمتی نہ کریں، گویا تاریخ کا فیصلہ بہت جلد آگیا۔ضیا طیارے میں جل گیا آج اس کی قبر پر کوئی نہیں جاتا جبکہ بھٹو کو پھانسی دینے والی عدالت نے اس فیصلے کو غلط قرار دیا۔ بھٹو شہید ٹھہرا آج گڑھی خدا بخش میں بھٹو کی قبر پر ہزاروں لوگ دھمال ڈالتے ہیں۔
آج سے ایک سو سال بعد ہم میں سے کوئی بھی زندہ نہیں رہے گا، تاریخ ہمیں روندتی ہوئی آگے نکل جائے گی ، آج یہ فیصلہ کرنا مشکل ہے کہ ہم میں سے کون تاریخ کی صحیح سمت میں کھڑا ہے اور کون تاریخ کے غلط دوراہے پر ہے ،کون حق کا ساتھی ہے اور کون باطل کے ساتھ کندھا ملائے ہوئے ہے، کون سچائی کا علمبردار ہے اور کون جھوٹ کی ترویج کر رہا ہے، کون دیانت دارکا ساتھی تھا اور کون بے ایمان کے شانہ بشانہ ، کون ظالم کا ہمراہی اور کون مظلوم کا طرفدار ۔ ہم میں سے ہر کوئی خود کو حق سچ کا راہی کہتا ہے مگر ہم سب جانتے ہیں کہ یہ بات دنیا کا سب سے بڑا جھوٹ ہے، کیا ہم اپنے حصے کا سچ بول رہے ہیں ؟وطن عزیز میں صحافت پر کڑا وقت آیا مگر ایسے لوگ بھی ہیں جو سچ کہنے سے باز نہ آئے ،ارشد شریف نے اسی سچ کی خاطر موت کو گلے لگا لیا ۔
یاد رکھیں !آج سے سو برس بعد جب کوئی مورخ ہمارا احوال لکھے گا تو وہ ایک ہی کسوٹی پر ہم سب کو پرکھے گا، مگر افسوس کہ اُس وقت تاریخ کا بے رحم فیصلہ سننے کے لئے ہم میں سے کوئی بھی زندہ نہیں ہوگا۔ سو آج ہم جس دور سے گزر رہے ہیں کیوں نہ خود کو ہم ایک بے رحم کسوٹی پر پرکھ لیں اور دیکھ لیں کہ کہیں ہم یونانی اشرافیہ کے ساتھ تو نہیں کھڑے جنہوں نے سقراط کو زہر کا پیالہ تھما دیا تھا، کہیں ہم برونو کو زندہ جلانے والے پادریوں کے ساتھ تو نہیں کھڑے، کہیں ہم حجاج کی طرح ظالموں کے ساتھ تو نہیں کھڑے، کہیں ہم امام ابوحنیفہ اور امام مالک پر کوڑے برسانے والوں کے ساتھ تو نہیں کھڑے، کہیں ہم ابن رشد کے خلاف فتویٰ دینے والوں کے ساتھ تو نہیں کھڑے، کہیں ہم یزید یا ضیا کے حامی تو نہیں کہیں ہم تاریخ کی غلط سمت میں تو نہیں کھڑے؟
٭٭٭

متعلقہ خبریں