یکجہتی فلسطین کے لیے ملک گیر ہڑتال

ریاض احمدچودھری

محترم لیاقت بلوچ،نائب امیر جماعتِ اسلامی،پاکستان نے کہا ہے کہ امیر جماعتِ اسلامی حافظ نعیم الرحمن کی یکجہتی فلسطین کے لیے ملک گیر ہڑتال کی کال پر ملک بھر کی تاجر برادری سے اتفاقِ رائے ہوگیا ہے کہ 26 اپریل کو پورے ملک میں ایک دِن ملک گیر شٹرڈاؤن ہڑتال ہوگی۔ 20 اپریل کو اسلام آباد میں اسرائیلی صیہونی مظالم کے خلاف اور مظلوم بہادر فلسطینیوں سے اظہارِ یکجہتی کے لیے تاریخ ساز، فقیدالمثال غزہ مارچ ہوگا۔ حکومتِ پاکستان فلسطین کے مسئلہ پر بزدلی، بے حِسی اور مجرمانہ غفلت ترک کرے اور سفارتی، اقتصادی، عسکری محاذوں پر فعالیت کے لیے اہم ترین مسلم ممالک سے مِل کر لائحہ عمل بنانے کی سرگرمی پیدا کرے، وگرنہ پاکستان کے عوام غزہ مارچ، ملک گیر ہڑتال، فلسطین مارچ کے بعد حکومت کی بے حِسی اور بزدلی کے خلاف فیصلہ کْن اقدام کریں گے۔
جناب لیاقت بلوچ نے کراچی کے تاریخ ساز، فقیدالمثال یکجہتی مارچ کی کامیابی کے بعد ٹیلی فون پر کراچی کے عوام، کارکنان، خواتین، نوجوانوں اور محنت کشوں کی تحسین کرتے ہوئے کہا کہ قبلہ اول کی آزادی، فلسطینیوں، کشمیریوں کی آزادی، حقِ خودارادیت کے حصول سے محبت اور اسرائیلی صیہونی ناجائز انسان دشمن جنگی مجرموں کے خلاف شدید نفرت کا اظہار ہے۔ عالمِ اسلام کی قیادت عالمِ اسلام میں عوام کے والہانہ اتحادِ اْمت کے جذبوں کی غیرت مند آواز پر کان دھریں، غفلت اور مجرمانہ بزدلی جاری رکھی گئی تو عوام کا رْخ بزدل حکمرانوں کے خلاف ہوگا۔
سیکرٹری جنرل مِلی یکجہتی کونسل لیاقت بلوچ نے کِسان بورڈ اور کِسان اتحاد کے وفود سے ملاقات میں کہا کہ وفاقی اور صوبائی حکومتیں زراعت اور گندم کے کاشت کاروں کو تباہ کرنے کا تہیہ کئے ہوئے ہیں۔ پنجاب حکومت کے گذشتہ ایک سال کے نمائشی اقدامات سے زراعت اور کِسانوں کو کوئی فائدہ نہیں ہورہا۔ گندم کے کاشت کار کو تباہی سے بچاکر ہی قومی معیشت کا پہیہ رواں دواں ہوگا۔ لیاقت بلوچ نے کِسان وفود کو یقین دِلایا کہ جماعتِ اسلامی زراعت اور کِسانوں کے بچاؤ کے لیے ہر دَم کسانوں کے ساتھ کھڑی رہے گی۔ کِسان/ہاری اپنے اتحاد کی طاقت سے اپنے آپ کو بچائیں، یہ قومی فرض بھی ہے۔ امیر جماعتِ اسلامی پنجاب وسطی محمد جاوید قصوری نے پنجاب بھر میں کِسان احتجاج کی تفصیلات سے آگاہ کیا اور کہا کہ کِِسانوں سے مِل کر آئندہ کے لائحہ عمل کا اعلان کیا جائے گا۔
وفاقی اور صوبائی حکومتیں عاقبت نااندیشی اور عالمی استعماری اداروں کے دباؤ میں زراعت اور کِسانوں کو ہولناک نقصانات پہنچا رہی ہیں۔ سیاسی جماعتوں اور سیاسی قیادت کی نااہلی، کرپٹ طرزِ حکمرانی کی وجہ سے سیاست، جمہوریت، پارلیمان پر فوجی سکیورٹی ادارے، پولیس اور بیوروکریسی بالادست ہوگئے ہیں، جس سے سیاست کمزور اور ریاست غیرمستحکم ہورہی ہے۔ پانی کی تقسیم کا قومی معاہدہ طے شدہ، کوئی صوبہ کسی دوسرے صوبہ اور کوئی طاقت ور کسی کمزور کِسان اور ہاری کا پانی چوری نہ کرے۔ وزیراعظم شہباز شریف بیرونی دوروں کے ساتھ ملک کے اندرونی مسائل کے حل کو بھی ترجیح بنائیں۔ صدر اور وزیراعظم صوبوں کی بڑھتی شکایات سے کمزور ہوتی فیڈریشن کا سدِباب کریں۔ صوبوں کی شکایات کا بروقت ازالہ کیا جائے۔ لاپتہ افراد کی بازیابی اور سیاسی قیدیوں کی فی الفور رہائی کے لیے اقدامات کیے جائیں۔ حکومتیں کب تک ریت میں مْنہ چھپائے پِھرتی رہیں گی، عوام کی فریاد سْنیں اور اْن کی دادرسی کریں۔
لاہور میں مِلی یکجہتی کونسل کے مرکزی رہنما پیر ہارون گیلانی سے ملاقات کے موقع پر کہا کہ سعودی عرب اور ایران کے مضبوط ہوتے تعلقات پوری اْمت کے لیے خیر اور اطمینان کا پیغام ہیں۔ اِسی طرح پاکستان اور بنگلہ دیش کے درمیان سفارتی تعلقات کی بحالی خوش آئند ہے۔ پاکستان اور بنگلہ دیش دو قالب یک جان ہیں۔ اِس موقع پر اتفاق رائے پایا گیا کہ ہدیةالہادی کی میزبانی میں 21 اپریل کو درگاہ میاں میر پر قومی قیادت سے رابطوں کا لائحہ عمل بنایا جائے گا۔نائب امیر جماعت اسلامی نے لاہور میں بلوچستان سے تعلق رکھنے والے طلبہ وفد سے گفتگو کرتے ہوئے کہا کہ بلوچستان میں امن و امان کی بگڑتی ہوئی صورتِ حال پر پوری قوم کو تشویش ہے۔ حالات کی خرابی کے بیشمار اسباب ہیں لیکن اعتماد کی بحالی کے لیے لاپتہ افراد کی بازیابی، بلوچستان کی قید خواتین کی رہائی اور بلوچستان کے مسائل کا عسکری نہیں سیاسی حل تلاش کرنا ہوگا۔ بلوچستان کے نوجوان، طلبہ و طالبات وقتی حالات سے مایوس ہونے کی بجائے اپنا مستقبل محفوظ کرنے کے لیے پْرامن سیاسی جمہوری مزاحمت کے راستہ پر قائم رہیں۔ بلوچستان کی معدنیات اور وسائل پر صوبے کے عوام کا پہلا حق ہے۔ بلوچستان کا حق بلوچستان کو دیا جائے۔ تیل کی قیمتوں میں کمی پوری قوم کا حق ہے۔ بجلی، تیل، گیس سستی ہوگی تو قومی معیشت کا پہیہ چلے گا۔ لیاقت بلوچ نے بلوچستان نکے نوجوانون، طلبہ و طالبات کو یقین دِلایا کہ پنجاب میں اْن کے حقوق کے تحفظ کے لیے جماعتِ اسلامی اپنا دینی قومی کردار ادا کرے گی۔

متعلقہ خبریں