الوداع ڈونلڈ ٹرمپ

(مہما ن کالم)
۔۔۔۔۔۔۔۔
میشل گولڈبرگ

اس سے پہلے کہ ڈیمو کریٹس سینیٹ میں اپنی ناکامی اور ایوان میں اپنے کم امیدواروں کی کامیابی کا تجزیہ شروع کریں، اس سے پہلے کہ پارٹی کے اندر مرکز پسند اور ترقی پسند گروپوں میں ایک دوسرے پر الزام تراشی کا سلسلہ شروع ہو جائے‘ فی الحال جو کچھ ہمارے سامنے موجود ہے‘ ہمیں اس کو خراجِ تحسین پیش کرنا چاہئے۔ وہ یہ کہ چار مشکل ترین برسوں کے بعد انجام کار ڈونلڈ ٹرمپ کو شکست کا سامنا کرنا پڑا۔ یہ سچ ہے کہ ڈانواں ڈول ریاستوں میں الیکشن کا فیصلہ آخری لمحات میں ہوا، اور یہ بھی سچ ہے کہ سات کروڑ سے زائد امریکی شہریوں نے چار سال ٹرمپ کو آزمانے کے باوجود انہیں مزید چا رسال دینے کے حق میں ووٹ دیا جو ہمارے ملک کے مستقبل کے لیے کوئی نیک شگون نہیں۔ یہ اس بات کی یاد دہانی بھی ہے کہ یہ کتنی بدترین صورت حال ہوتی۔ ہم نے پولنگ ڈیٹا کی مدد سے جتنے بھی اندازے لگائے تھے‘ ٹرمپ اس سے کہیں زیادہ تعداد میں اپنے حامیوں کو گھروں سے نکالنے میں کامیاب رہے۔ ٹرمپ پینسلوینیا میں ہار گئے‘ مگر انہیں یہاں سے پچھلے الیکشن کے مقابلے میں 33لاکھ ووٹ زیادہ ملے ہیں۔ جو بائیڈن کو ٹیکساس سے 2016ء کے ا لیکشن کے مقابلے میں ٹرمپ سے زیادہ ووٹ ملے ہیں۔ اس تبدیلی کی بظاہر کوئی وجہ نظر نہیں آتی۔ دراصل ایک سرخ لہر آئی ہوئی تھی جو ٹرمپ کو وکٹری ا سٹینڈ تک لے جانے کے لیے کافی نہیں تھی۔ یہ سرخ ٹرن آئوٹ کئی ریاستوں میں ریپبلکن پارٹی کے لیے ایک نعمتِ غیر مترقبہ ثابت ہوا جہاں اس نے دونوں طرح کے فائدے اٹھائے، ان لوگوں سے بھی جوٹرمپ سے محبت کرتے تھے مگر وہ ماضی میں ریپبلکن پارٹی کے مستقل ووٹر ز نہیں رہے تھے۔ ریپبلکن سینیٹرز نے ٹیکساس اور مین کی ریاستوں میں ٹرمپ کے لیے بہت زیادہ کام کیا۔ اور ڈیوڈ پرڈو کے کیس میں تو جارجیا میں ان کی تھوڑی بہت برتری بھی نظر آئی۔

سینیٹ میں ریپبلکن اکثریت کوئی بہت بڑی رکاوٹ نہیں ہے کیونکہ ابھی الاسکا اور نارتھ کیرولائنا میں ریس جاری ہے اور جارجیا میں بھی دو مرتبہ رن آف الیکشن ہونے کی توقع ہے۔ جو بائیڈن کی پہلی ٹرم میں تو سنگین مضمرات نظر آتے ہیں۔ جمہوریت پسند اصلاحات جن سے مستقبل میں اقلیتی گروپ کی حکمرانی کی راہیں مسدو دکی جا سکیں‘ فی الحال پس منظر میں جاتی دکھائی دیتی ہیں۔ یہ بات قابل فہم ہے کہ بائیں بازو کی طرف کافی مایوسی پھیلی ہوئی ہے مگر محض اس بنا پر ہمیں صدر ٹرمپ کے خطرناک دورِ صدارت کے خاتمے جیسے بڑے کارنامے کی اہمیت کو کم نہیں کرنا چاہئے۔ بہت کم امریکی صدر پہلی ٹرم کے بعد شکست کھاتے ہیں۔ ایک صدی میں شاید یہ پانچویں مرتبہ ہوا ہے۔ ہمیں اس بات کو بھی فراموش نہیں کرنا چاہئے کہ ایک سیاہ فام خاتون پہلی مرتبہ امریکاکی نائب صدر بنی ہے۔ الیکٹورل کالج کی وجہ سے فیصلہ کن ریاستیں اس الیکشن میں دائیں بازو کے ساتھ تھیں۔ صدر ٹرمپ نے اپنے حریف کے مقابلے میں تمام اختیارات اپنے ہاتھ میں سمیٹنے کی کوشش کی تھی۔ انہوں نے یوکرائن کی حکومت پر جو بائیڈن کی سیاسی ساکھ خراب کرنے کے لیے ایک مذموم مہم چلانے کے لیے دبائو ڈالا اور کانگرس میں اپنے اتحادیوں کو جو بائیدن کے خلاف تحقیقات شروع کرانے کے لیے اکسایا۔ انہوں نے دوبارہ صدر بننے کے لیے قومی وسائل کا استعمال کیا اور وائٹ ہائوس میں ریپبلکن نیشنل کنونشن کے انعقاد کا موقع فراہم کیا۔ انہوں نے ایک اور عجیب و غریب حرکت یہ کی کہ Stimulus Checks پر اپنا نام لکھ دیا گویا کہ یہ رقم ان کی جیب سے آئی ہو۔ اپنے ایک ذاتی خدمت گار کو پوسٹل سروس کے اعلیٰ ترین منصب پر بٹھا دیا جس نے کورونا وائرس کے دوران میل بیلٹس کی فراہمی کے عمل کو سست رفتار کر دیا کیونکہ ڈیمو کریٹس کے ووٹرز کی ایک بڑی تعداد ان میل بیلٹس پر ہی انحصار کر رہی تھی۔ ٹرمپ نے عدالتوں میں ایسے ججز کا تقرر کیا جن کے بارے میں تاثر ہے کہ وہ تھوڑے مارجن سے ہاری ہوئی ریاستوں کے بارے میں ان کی مرضی کے احکامات جاری کریں گے۔

اس سال جمہوریت کی نگرانی کرنے والے ایک عالمی پروجیکٹ V-Dem نے لکھا ہے ’’مغربی یورپ اور شمالی امریکا میں امریکا واحد ملک ہے جو اس وقت مطلق العنانیت کا سامنا کر رہا ہے‘‘۔ ا سی طرح واشنگٹن پوسٹ کے فراہم کردہ اعداد و شمار سے ثابت ہوتا ہے کہ جن ممالک نے بھی اس جمہوری راستے کا انتخاب کیا تھا ہر پانچ میں سے ایک ملک ہی درست انداز میں اس راہ پر چل سکا‘ باقی سب مطلق العنانیت کا شکار ہو گئے۔ اگر ٹرمپ کو ایک اور ٹرم مل جاتی تو امریکا بھی ہنگری، پولینڈ اور برازیل جیسی قانون شکن ریاست بن جاتا۔ ان تما م سنگین اقدامات کو درست ثابت کرنے کے لیے غیرمعمولی اتحاد کی ضرورت ہے جو انجیلا ڈیوس سے لے کر بل کرسٹل تک وسیع ہونا چاہئے۔ وقت کا تقاضا ہے کہ جو لوگ برنی سینڈرز کی شکست سے دل برداشتہ ہو گئے تھے وہ جو بائیڈن کے لیے دوبارہ متحرک ہو جائیں۔ اس مقصد کے لیے کچھ ریپبلکن ارکان کو بھی چاہئے کہ پارٹی وفاداری سے بالاتر ہو کر ملکی مفاد کے لیے تعاون کو ترجیح دیں۔ ایگزٹ پولز سے تو پتا چل گیا تھا کہ ٹرمپ نے سیاہ فام اور لاطینی ووٹرز خاص طور پر فلوریڈا میں رہنے والے کیوبن نڑاد ووٹرز میں اپنا مارجن بہتر بنا لیا ہے مگر ہمیں پھر بھی جو بائیڈن کی جیت کے لیے رنگدار ووٹرز کا مرہونِ منت ہونا چاہئے۔ جس وقت میں یہ کالم لکھ ر ہا ہوں وہ ایریزونا میں لیڈ لے رہے ہیں اور اس کی واحد وجہ یہ ہے کہ انہیں وہاں کے لاطینی ووٹرز نے بڑی تعداد میں ووٹ دیا ہے۔ جارجیا میں بھی انہیں معمولی برتری حاصل ہے۔ اس کی بڑی وجہ سٹیسی ابرامز کے نیو جارجیا پروجیکٹ کی شاندار کارکردگی ہے۔

الیکٹورل کالج ضوابط کی روشنی میں کئی اہم ریاستوں میں پوسٹل بیلٹس کی گنتی سب سے آخر میں ہوئی وہاں زیادہ بے چینی پائی گئی۔ جیسا کہ نیٹ سلور نے ٹویٹ کیا تھا ’’اگر پاپولر ووٹ کے تناظرمیں دیکھیں تو 2000ء کے بعد یہ دوسرے کم ترین مارجن والے الیکشن تھے‘‘۔ امریکی عوام نے فیصلہ کن انداز میں ٹرمپ کو مسترد کر دیا۔ اب ہمیں اس صدر کے پہنچائے ہوئے نقصان کا ازالہ کرنا ہے جو فاکس نیوز اور دائیں بازو کی شخصیات کے ساتھ مل کر امریکی عوام کو قائل کرنے کی کوشش کر رہا ہے کہ اس کی شکست غیر قانونی ہے۔ ٹرمپ کے پیروکار سمجھتے ہیں کہ صرف وہی عوام کی نمائندگی کرتے ہیں اور اس طرح بات کرتے ہیں گویا کہ وہی اپنے ملک کے ساتھ نامیاتی تعلق رکھتے ہیں‘ ان کے حریف نہیں۔ انہیں یہ سمجھانا بہت مشکل ہو گا کہ اب وہ ا س ملک کی ایک بھاری اقلیت ہیں؛ تاہم اس وقت امریکا کی لبرل جمہوریت کو لاحق سنگین خطرات کا اندیشہ کم ہو گیا ہے۔ اپنے باقی ماندہ دنوں میں وہ پورے ملک کو ایک تعطل کا شکار کرنے کی کوشش کریں گے مگر بہت جلد وہ اس ملک پر حقِ حکومت کھو دیں گے۔ انہیں وائٹ ہائوس سے اٹھا باہر کیا دیا جائے گا تاکہ وہ اپنے قرض دہندگان اور نیو یارک کے فوجداری مقدمات کے تفتیش کاروں سے مل سکیں۔ امریکی تاریخ کا اگلا باب اتنا آسان نہیں ہو گا مگر یہ والا توہین آمیز خوفناک اور المناک باب تو کم از کم بند ہو چکا ہے۔
۔۔۔۔۔۔۔۔۔۔۔۔۔

متعلقہ خبریں