سندھ کا تاریخی قلعہ رنی کوٹ ۔۔ صدیوں بعد بحالی کی راہ پر گامزن

سندھ میں حیدرآباد کے قریب ضلع جام شورو میں سندھ کے قوم پرست سیاستدان اور تحریک پاکستان میں قائد اعظم کا ساتھ دینے والے عظیم سندھی رہنما جی ایم سید کے آبائی گائوں سن سے کم وبیش 30 کلومیٹر کے فاصلے پر سندھ کا عظیم تاریخی قلعہ رنی کوٹ واقع ہے۔
یہ قلعہ اپنے اندر پراسراریت کی ایک داستان چھپائے ہوئے ہے ، اس بارے میں کوئی مصدقہ اطلاع موجود نہیں ہے کہ یہ قلعہ کس دور میں اور کس نے تعمیر کرایا ہے ،بس اس کے بارے میں مختلف حلقوں میں مختلف باتیں کہی جاتی رہی ہیں۔مورخین کے ایک طبقے کاکہناہے کہ یونانیوں نے جب سندھ پر حملہ کیاتو خود کو بیرونی حملہ آوروں سے محفوظ رکھنے کے لیے انھوںنے اس قلعہ کی تاریخی دیوار تعمیر کرائی تھی ،جبکہ مورخین کے ایک دوسرے طبقے کاخیال ہے کہ یہ دیوار ساسانیوں نے اپنی حفاظت کے لیے تعمیر کرائی تھی۔جبکہ مورخین کے ایک تیسرے طبقے کاخیال ہے کہ یہ قلعہ اتنا زیادہ قدیم نہیں ہے اور یہ قلعہ تالپوروں نے اپنے دور حکومت میں اپنے تحفظ کے لیے تعمیر کرایاتھا۔قطع نظر اس کے کہ یہ قلعہ اور اس کی وسیع وعریض دیوار کس دور میں تعمیر ہوئی اور کس نے تعمیر کرائی، یہ ایک حقیقت ہے کہ یہ قلعہ سندھ کے ان چند تاریخی مقامات میں شامل ہے جو طویل عرصے تک سیاحوں کا مرکز نگاہ بنا رہاہے اور لوگ دور دور سے اس تاریخی قلعہ کو دیکھنے کے لیے جامشورو ضلع میں واقع سن پہنچاکرتے تھے۔ بعد ازاں برسراقتدار آنے والی حکومتوں کی چشم پوشی کی وجہ سے یہ قلعہ بوسیدہ ہوتاگیا اور سیاحوں کے لیے اپنی کشش کھوتا چلاگیا جس کے بعد اس قلعہ کو دیکھنے کے لیے آنے والے لوگوںکی تعداد بتدریج کم ہوتی چلی گئی۔اور یہ تاریخی قلعہ موئن جودڑو کا منظر پیش کرنے لگا لیکن بعد میں حکومت نے اپنے اس تاریخی ورثے کی جانب توجہ دینا شروع کی اور بعد از خرابی بسیار اس کی بحالی کاکام شروع کیاگیا۔اس کی تعمیر ومرمت اور بحالی کے لیے ایک انڈوومنٹ فنڈ قائم کیاگیا اور اس فنڈ کے ذریعے اس کی تعمیرومرمت اور بحالی کاکام بتدریج آگے بڑھتاگیا یہاں تک کہ آج صدیوں سے نظر انداز کیاگیا یہ تاریخی قلعہ ایک دفعہ پھر کسی حد تک پرانی شکل میں بحال ہوگیاہے۔
اس تاریخی قلعہ کی بحالی کے کام کے نگراں سندھ ہیری ٹیج سے متعلق انڈوومنٹ فنڈ ٹرسٹ کے سیکریٹری عبدالحمید اخوند زادہ کا کہناہے کہ اگرچہ اس قلعہ کی تاریخ کے بارے میں کوئی بھی مستند تاریخ موجود نہیں ہے لیکن خیال اغلب ہے کہ یہ قلعہ ساسانیوں نے تعمیر کرایاتھا اور بعد میں1819 میں تالپور دور حکومت میں اس قلعہ میں توسیع واضافے کے ساتھ اس کی تزئین آرائش کاکام کرایاگیا۔ یہی وجہ ہے کہ اس قلعہ کی دیوار اور بعض مقامات پر تالپور دور کے فن تعمیر کی جھلک نظر آتی ہے جس کی بنیادپر بعض مورخین نے یہ قیاس کرلیا کہ یہ قلعہ تالپور دور ہی میں تعمیر کرایاگیاہوگا۔جبکہ ایک سندھی ادیب اورماہر آثار قدیمہ کلیم اللہ لاشاری کافلسفہ ان سب سے جدا ہے۔ اُن کااصرار ہے کہ یہ قلعہ 1819 میں تالپور دور میں ہی تعمیر کرایاگیا ہے اور اس کی تعمیر کاسہرا عربوں، ساسانیوں یا یونانیوںکے سر نہیں باندھا جاسکتا تاہم اس کے ساتھ ہی ان کایہ بھی اصرار ہے کہ یہ قلعہ تعمیر تو بڑے شوق سے کرایاگیا لیکن اس میں کسی بھی دور حکومت میں کسی نے بھی رہائش اختیار نہیں کی اور یہ خیال کرنا کہ چھوٹے قلعہ شیر گڑھ میں حکمرانوںکی بیگمات اور بڑے قلعہ میں مرد قیام پزیر رہے، محض قیاس آرائیاں ہیں۔ اُنھوںنے بتایا کہ وہ اس قلعے کے حوالے سے ایک ضخیم کتاب لکھ رہے ہیں جو اگلے سال تک مارکیٹ میں آجائے گی اس کتاب میں قلعہ کے حوالے سے تمام تفصیلات موجود ہوں گی اور حقائق سے پردہ اٹھ جائے گا۔
اخوند زادہ کاکہناہے کہ اس قلعہ کی دیوار مجموعی طورپر 30 کلومیٹر رقبے پر محیط ہے اور اس کے اندر ایک نہیں بلکہ دو قلعے ہیں،ان میں سے ایک نام میری کوٹ ہے جوزیریں علاقے میں تعمیر کیاگیاتھا اور دوسرے کے مقابلے میں زیادہ بڑا ہے،جبکہ دوسرا قلعہ بالائی علاقے میں واقع ہے تاہم وہ زیریں علاقے میں واقع میری کوٹ کے مقابلے میں بہت چھوٹا ہے۔ بالائی علاقے میں واقع قلعہ شیر گڑھ کہلاتا ہے اور خیال کیاجاتاہے کہ سابق ساسانی حکمرانوں اور اس کے بعد تالپور دور کے حکمرانوں کی بیگمات اسی قلعہ میں رہتی تھیں۔
اس تاریخی قلعہ کو دیکھنے کے لیے آنے والے سیاحوں کی تعداد میں کمی کے حوالے سے اخوند زادہ کا کہنا تھا کہ قلعہ دیکھنے کے لیے آنے والے سیاحوں کی تعداد میں کمی کا سبب اس قلعہ کی زبوں حالی نہیں تھی کیونکہ سیاح تو ایسے مقامات کو نوادرات تصور کرتے ہوئے اس کی تصویریں بنانے کو ترجیح دیتے ہیں ۔اُن کاکہنا تھا جو بڑی حد تک صحیح بھی معلوم ہوتاہے کہ اس علاقے میں سیاحوں کی آمد میں کمی کاسبب اس علاقے تک ٹرانسپورٹ کے نظام کافقدان اوریہاں تک پہنچنے کے لیے مناسب سڑکوں کی عدم موجودگی ہے۔ہموار سڑکوںکی عدم موجودگی کے باعث نجی ٹرانسپورٹرز بھی اس علاقے میں گاڑیاں چلانے کوتیار نہیں ہوتے اور علاقے کے لوگوں کو قریبی شہر تک جانے کے لیے عام طورپر پیدل ہی سفر کرنے پر مجبور ہونا پڑتاہے۔انھوں نے بتایا کہ رنی کوٹ تک پہنچنے کے لیے سن سے رنی کوٹ تک صرف ایک ہی سڑک ہے لیکن اس سڑک کی حالت بھی انتہائی ناگفتہ بہ ہے اور اسے موجودہ حالت میں سڑک کہنا بھی سڑک کی توہین کے مترادف ہے۔انھوں نے بتایا کہ میں نے وزیر اعلیٰ مراد علی شاہ کو ایک خط لکھاتھا جس میں ان کی توجہ اس سڑک کی زبوں حالی اور اس کی دوبارہ تعمیر کی ضرورت کی طرف مبذول کرانے کی کوشش کی تھی اس کے جواب میں وزیر اعلیٰ ہائوس نے مجھے اس طرف توجہ دلانے پر شکریے کا خط بھی لکھا لیکن اس سڑک کی تعمیر کے لیے ابھی تک کچھ نہیں کیاجاسکا ہے۔
اس تاریخی قلعہ کی بحالی کے کام کے نگراں سندھ ہیری ٹیج سے متعلق انڈوومنٹ فنڈ ٹرسٹ کے سیکریٹری عبدالحمید اخوند زادہ کا کہناہے کہ رنی کوٹ تک پہنچنے کے لیے ماضی میں اس علاقے میں دو پل ہوا کرتے تھے،لیکن اب یہ دونوں پل ٹوٹ پھوٹ کا شکار ہوکر انتہائی فرسودہ ہوچکے ہیں ۔اُن میں سے ایک تو قصۂ پارینہ بن چکاہے اور دوسرا جو موجود ہے اس پر سفر کرنا بھی مشکل تھا۔ تاہم انڈوومنٹ ٹرسٹ نے اس کی مرمت کراکے اسے استعمال کے قابل بنادیاہے۔
رنی کوٹ قلعہ کاشمار سندھ کے تاریخی ورثے میں ہوتاہے لیکن سابقہ حکومتوں کی چشم پوشی اور اس قلعہ کی دیکھ بھال اور تعمیر ومرمت کے لیے فنڈز کی عدم فراہمی کی وجہ سے یہ قلعہ بتدریج کچرے کے ڈھیر میں تبدیل ہوتا جارہاتھا۔ اس کی دیواروں کی اینٹیں گر رہی تھیں اور غائب ہورہی تھی اور دشوار گزار پہاڑی علاقہ ہونے کی وجہ سے اس قلعہ تک پہنچنا بہت مشکل ہوگیاتھا، لیکن 4 سال قبل انڈوومنٹ فنڈ ٹرسٹ کے ذریعہ اس کی بحالی کے کام کا آغاز کیاگیا اور ٹرسٹ کو اس میں بڑی حد تک کامیابی ہوئی ہے۔ اخوندزادہ کاکہناہے کہ اس قلعہ کی تعمیر ومرمت کے کام میں سب سے بڑی دشواری اس پورے علاقے میں پانی کی کمیابی بلکہ نایابی ہے جس کی وجہ سے قریبی علاقوں سے پانی لانا پڑتاہے جو انتہائی مشکل اور دقت طلب کام ہے۔ اخوندزادہ نے بتایا کہ قلعہ کو اس کی پُرانی شکل میں ڈھالنے کے لیے پہلے کچی مٹی سے اس کی دیواریں تعمیر کی گئیں اور اس کے بعد اس پر چونے کاپلاسٹر کیاگیاہے جس کے بعد اس کو مزید مضبوط بنانے کے لیے بھی چونے کاسہارا لیاگیاہے۔اُنھوں نے بتایا کہ چونکہ اس قلعہ پرصدیوں سے کوئی توجہ نہیں دی گئی اس لیے اس کی دیواروں میں جگہ جگہ سے دراڑیں پڑ گئی تھیں،اس لیے اس کی بحالی کاکام بظاہر بہت مشکل بلکہ ناممکن نظر آرہاتھا لیکن بحالی کاکام کرنے والوں نے انتہائی لگن اور محنت کے ساتھ کام جاری رکھا اور دوسال کی کوششوں کے نتیجے میں قلعہ کاایک بڑا حصہ اور اس کاگیٹ پرانی شکل میں بحال کردیاگیا۔ اُنھوں نے بتایا کہ قلعہ پر آہنی گیٹ لگائے گئے ہیں لیکن اب علاقے میں بھاری گاڑیوں کاداخلہ ممنوع قرار دے دیاگیاہے کیونکہ بھاری گاڑیوں کی آمدورفت اور دھمک سے قلعہ کو نقصان پہنچنے کا اندیشہ نظر انداز نہیں کیاجاسکتا۔ انھوںنے بتایا کہ لوگ یہاں اپنی فیملیز کے ساتھ آکر پکنک مناسکتے ہیں اور اس تاریخی قلعہ کے کروفر سے لطف اندوز ہوسکتے ہیں،لیکن قلعہ کے اندر ویڈیو بنانے اور موسیقی کے پروگرام منعقد کرنے کی اجازت نہیں ہے۔
اب دیکھنا یہ ہے کہ قلعہ کی بحالی اور تعمیر ومرمت کاکام مکمل ہونے میں مزید کتنا وقت لگتاہے اور اس کام کی تکمیل کے بعد اس کی مستقل دیکھ بھال کاکوئی انتظام کیاجاتاہے یا اسے ایک دفعہ پھر حوادثِ زمانہ کے حوالے کردیاجاتاہے۔

متعلقہ خبریں